Úkimet «Tarbaǵataı Munaı» JShS múddesi úshin kodekske túzetý engizýi múmkin

ASTANA. KAZINFORM – Úkimet Shyǵys Qazaqstan oblysynyń Zaısan aýdanyndaǵy Sarybulaq ken ornyn ıgerip otyrǵan «Tarbaǵataı Munaı» JShS-ine salyq jeńildikterin berý máselesin pysyqtap jatyr. Bul týraly Premer-mınıstr Oljas Bektenov Májilis depýtattarynyń saýalyna joldaǵan jaýapta aıtty. 

— Ulttyq ekonomıka mınıstrligi Sarybulaq ken ornyn rentabeldiligi tómen, tutqyrlyǵy joǵary, sý basqan, ónimdiligi az jáne ıgerilgen ken oryndarynyń tizbesine engizý týraly «Tarbaǵataı Munaı» JShS-niń ótinishin pysyqtap jatyr. Qazir ınvestormen birlesip jobanyń barlyq tehnıkalyq parametrleri pysyqtalyp jatyr. Sodan soń ol Ekonomıkany jańǵyrtý máseleleri jónindegi memlekettik komıssııanyń qaraýyna shyǵarylady. Óz kezeginde, Energetıka mınıstrligi men «Tarbaǵataı Munaı» JShS jer qoınaýyn paıdalanýǵa arnalǵan kelisimshartta kózdeletin tıisti qarsy mindettemeler boıynsha kelissózder júrgizip jatyr. Sondaı-aq osy ken ornynyń munaıyn otandyq iri munaı óńdeý zaýyttarynda («AMÓZ» JShS, «PMHZ» JShS, 2 «PKOP» JShS) óńdeý múmkindigi bolmaǵan jaǵdaıda ınvestordyń óndirilgen munaıdy eksportqa berý múmkindigin qarastyrý josparlanyp otyr, — dep jazylǵan jaýapta.

Atalǵan kásiporynnyń múddesi úshin «Jer qoınaýy jáne jer qoınaýyn paıdalaný týraly» kodekske túzetýler engizilýi múmkin.

— Energetıka mınıstrligi qarsy ınvestıtsııalyq mindettemeler qabyldaý shartymen «Tarbaǵataı Munaı» JShS usynǵan daıyndyq kezeńindegi kúrdeli qurlyq jobalaryna jaqsartylǵan modeldik kelisimshart mehanızminiń qoldanylýyn keńeıtý bóliginde «Jer qoınaýy jáne jer qoınaýyn paıdalaný týraly» kodekske túzetýlerdi qarastyryp jatyr. Bul túzetýlerdi joǵaryda atalǵan zań jobasyna da engizý josparlanyp otyr. Sarybulaq ken ornyn ıgerý jáne damytý jónindegi barlyq máseleni múddeli memlekettik organdar ınvestormen belsendi talqylanyp jatyr, — dep jazady Premer-mınıstr.

Osydan eki jyl buryn Energetıka mınıstri Zaısan aýdanyndaǵy gaz kenishi sarqylyp qalǵanyn rastaǵan edi.