Úkimet sý sharýashylyǵyna qatysty máselelerdi talqylaıdy
ASTANA. KAZINFORM — Búgin Úkimet otyrysy ótedi. Onda Mınıstrler kabınetiniń músheleri sý sharýashylyǵyna qatysty máselelerdi egjeı-tegjeıli talqyǵa salady.
Naqtyraq aıtqanda, otyrystyń kún tártibine shyǵarylǵan másele boıynsha Sý resýrstary jáne ırrıgatsııa mınıstri Nurjan Nurjigitov sýmen jabdyqtaý jáne sý tartý júıelerin damytý, tsıfrlandyrý men sý únemdeý tehnologııalaryn engizý sharalary jaıly baıandama jasaıdy. Mınıstr sý ınfraqurylymyn jaqsartý maqsatynda vedomstvo atqaryp jatqan jumystarǵa toqtalady. Sondaı-aq ol Ulttyq sý resýrstary aqparattyq júıesi týraly da esep beredi.
Al Ónerkásip jáne qurylys mınıstri Ersaıyn Naǵaspaev Memleket basshysynyń jyl sońyna deıin barlyq eldi mekendi 100 paıyz aýyz sýmen qamtamasyz etý tapsyrmasyn oryndaý úshin vedomstvo tarapynan atqarylǵan jumystarǵa toqtalady. Sondaı-aq ol Prezıdenttiń erekshe baqylaýynda turǵan Mańǵystaý óńiri halqyn taza aýyz sýmen qamtamasyz etý jobalaryna basa nazar aýdartady. Munan bólek, sý júıelerin basqarý men tıimdiligin arttyrý úshin qolǵa alynǵan tsıfrlyq sheshimderdi ataıdy.
Otyrys qorytyndysynda baspasóz konferentsııasy uıymdastyrylady. Onda myna Úkimet músheleri BAQ ókilderi tarapynan týyndaǵan saýaldarǵa jaýap beredi:
1. Sý resýrstary jáne ırrıgatsııa mınıstri Nurjan Nurjigitov;
2. Ónerkásip jáne qurylys vıtse-mınıstri Qýandyq Qajkenov.
Úkimet otyrysynyń tikeleı taratylymy PrimeMinister.kz saıtynan, YouTube resmı arnasynda, Facebook áleýmettik jelisinde, sondaı-aq UKIMET Telegram-kanalynda júredi. Baspasóz konferentsııasynyń tikeleı taratylymy YouTube resmı arnasynda jáne Facebook áleýmettik jelisinde kórsetiledi.
Esterińizge sala ketsek, ótken aptada Premer-mınıstr Oljas Bektenovtiń tóraǵalyǵymen ótken Úkimet otyrysynda Memleket basshysynyń «Taza Qazaqstan» bastamasyn júzege asyrý máselesi qaraldy. Onda Ekologııa jáne tabıǵı resýrstar mınıstri Erlan Nysanbaev negizgi baıandama jasasa, Mádenıet jáne aqparat mınıstri Aıda Balaeva ekologııalyq jáne mádenı qundylyqtardy ilgeriletý, Oqý-aǵartý mınıstri Ǵanı Beısembaev mektepke deıingi jáne mekteptegi ekologııalyq tárbıe, Ǵylym jáne joǵary bilim mınıstri Saıasat Nurbek ekologııalyq bilim berý deńgeıin arttyrý, Týrızm jáne sport mınıstri Erbol Myrzabosynov ekotýrızm men salaýatty ómir saltyn nasıhattaý týraly sóz sóıledi.
Ekologııa jáne tabıǵı resýrstar mınıstri Erlan Nysanbaevtyń aıtýynsha, bıyl «Taza Qazaqstan» bastamasy aıasynda elimizde respýblıkalyq jáne halyqaralyq aktsııalardy qosa alǵanda barlyǵy 573 is-shara ótti.
Іs-sharalardyń nátıjesinde:
— 189 myń tonna qoqys jınaldy;
— 735 myń ga aýmaq tazartyldy;
— 2 mln-nan astam aǵash otyrǵyzyldy.
Mádenıet jáne aqparat mınıstri Aıda Balaeva «Taza Qazaqstan» bastamasy az ýaqyt ishinde jalpyulttyq sıpat alyp, halqymyzdy ortaq múddege biriktirgen úlken ıdeologııalyq platformaǵa aınalǵanyn aıtady.
— Mınıstrlik ótken jyly kıno salasyndaǵy ıdeologııalyq basymdyqtardy naqtylady. Qazirgi kezde «Zań men tártip», «Taza Qazaqstan» — basty taqyryptardyń birine aınalýda. «Taza Qazaqstan» ıdeıasy sheteldegi mádenı is-sharalar, halyqaralyq forýmdar men festıvalder, Mádenıet kúnderi aıasynda da keńinen tanystyrylyp keledi. Telearnalarda «Taza Qazaqstan» brendimen serıaldar, derekti fılmder men arnaıy jobalar qosylady, — dedi ol.
Oqý-aǵartý mınıstri Ǵanı Beısembaev taǵylymy tereń «Taza Qazaqstan» uǵymyn is júzinde júzege asyrý — ozyq oıly urpaq tárbıeleý nátıjesinde múmkin bolatynyna nazar aýdartty.
— Mınıstrlik múddeli memlekettik organdarmen, qoǵamdyq uıymdarmen birlese otyryp, atalǵan jumystardy aldaǵy ýaqytta da jalǵastyrady, — dedi mınıstr.
Ǵylym jáne joǵary bilim mınıstri Saıasat Nurbek Prezıdenttiń «Taza Qazaqstan» bastamasyn joǵary bilim salasynda júıeli túrde júzege asyrý jaıyna toqtaldy.
— Jalpy, Memleket basshysy «Taza Qazaqstan» aktsııasyn jarııalaǵannan beri joǵary oqý oryndarynyń stýdentteri men oqytýshylarynyń qatysýymen 1500-ǵa jýyq ártúrli is-sharalar ótkizildi. Bul sharalarǵa joǵary oqý oryndarynan 240 myńnan asa adam qatysty. Barlyq joǵary oqý oryndary stýdentteri arasynda «Taza Like» is-sharasy sheńberinde ekosaǵattar ótkizildi, — dedi Saıasat Nurbek.
Týrızm jáne sport mınıstri Erbol Myrzabosynov bolsa «Taza Qazaqstan» respýblıkalyq ekologııalyq naýqany aıasyndaǵy bastamalar «Taza tán, taza jan, taza sana» qaǵıdattaryna negizdelgenin atap ótti.
— Qazaqstanda ekotýrızm serpindi damyp keledi. Buǵan tabıǵı ártúrlilik, memlekettik qoldaý jáne halyqtyń qyzyǵýshylyǵy áser etýde. 2024 jyly ulttyq parkterge 2,8 mıllıonnan astam adam bardy. Bul — 2023 jylmen salystyrǵanda 18%-ǵa artyq. Eń tanymal parkter: Іle-Alataýy, Sharyn, Altyn-Emel jáne Kólsaı. Sońǵy bes jylda ulttyq parkterde 2,1 mlrd teńge kóleminde jeke ınvestıtsııa tartylyp, 8 joba iske asyryldy, — dedi ol.
Úkimet otyrysyn qorytyndylaǵan Premer-mınıstr Oljas Bektenov mynadaı tapsyrmalar berdi:
— qorshaǵan ortany lastaǵan adamdarǵa qatysty qatań sharalar qoldana otyryp, keń aýqymdy túsindirý jumysyn júrgizý;
— óskeleń urpaqtyń boıynda ekologııalyq mádenıetti tárbıeleýge jurtshylyqty, qaýymdastyqtar men birlestikterdi keńinen tartýdy qamtamasyz etý;
— otbasylyq dástúrli qundylyqtardy, qoǵamdaǵy durys minez-qulyqty, mádenı muralarǵa uqypty kózqarasty, otanshyldyq qasıetterdi sińirý;
— Týrızm jáne sport mınıstrligine óńir ákimdikterimen birlesip, árbir eldi meken boıynsha barlyq buqaralyq sporttyq is-sharanyń biryńǵaı kúntizbesin ázirleý;
— jalpyǵa birdeı paıdalanýǵa arnalǵan negizgi ekotýrızm obektileriniń kartasyn jasap, onda ornalasqan jeri, týrıstik obektiler jáne basqa da qajetti málimetter kórsetý;
— Mádenıet jáne aqparat mınıstrligine múddeli memlekettik organdarmen birlesip, bir aı merzimde halyq arasynda ekologııalyq jáne rýhanı mádenıetti tárbıeleý jóninde naqty usynystar ázirleý;
— atqarylǵan jumystyń qorytyndysy boıynsha ekologııalyq mádenıetti damytýdyń «Taza Qazaqstan» tujyrymdamasyn ózektendirý.
— Elimizdiń ekologııalyq máselelerin sheshýge jáne tabıǵı baılyǵymyzdy saqtaýǵa turǵyndar da barynsha atsalysyp keledi. Bilim oshaqtarynda «Adal azamat» biryńǵaı baǵdarlamasy aıasynda balalarǵa ekologııalyq tárbıe berý jumystary júrgizilip jatyr. Atalǵan bastamaǵa ata-analar men ustazdar qaýymy da qatysyp jatyr. Mundaı ekologııalyq mádenıet qazirgi Qazaqstan qoǵamynyń kúndelikti ómir saltyna aınalýy qajet. Tazalyq tazartylǵan jerde emes, qoqys tastalmaǵan jerde. Bárimiz osy qarapaıym ǵana qaǵıdany únemi jadymyzda ustaǵanymyz abzal, — deıdi Oljas Bektenov.