Úkimet sý tasqynynan keıin ınfraqurylymdy qalpyna keltirýge qosymsha 22,7 mlrd teńge bóldi
ASTANA. KAZINFORM – Qazaqstan Úkimeti kóktemgi sý tasqyny saldaryn joıýǵa jáne zaqymdalǵan ınfraqurylymdyq nysandardy qalpyna keltirýge tótenshe rezervten qosymsha 22,7 mlrd teńge bóldi. Tıisti qaýlyǵa QR Premer-Mınıstri Oljas Bektenov qol qoıdy. Bul týraly Úkimettiń baspasóz qyzmeti habarlady.
Qarajat Aqmola, Aqtóbe, Qostanaı jáne Soltústik Qazaqstan oblystaryndaǵy joldardy, sondaı-aq kópirler men sý ótkizgish qurylymdardy qalpyna keltirýge, rekonstrýktsııalaýǵa jáne qurylys jumystary úshin ákimdikterge bólinedi. Atap aıtqanda, Aqtóbe oblysynda 31 joba júzege asyrylyp jatyr. Olardyń ishinde Yrǵyz – Nura, Yrǵyz – Quttykól, Qumtoǵaı avtojoldaryndaǵy sý ótkizgish qubyrlardy, Oıyl aýylyna aparatyn avtojoldy jóndeý, Oıyl ózenindegi kópirdi qaıta jańǵyrtý, sondaı-aq Áıteke bı aýdany Áıke aýylyndaǵy kópir ótkeli qurylysy bar.
Aqmola oblysynda Atbasar qalasyna aparatyn jol bóligin, Atbasar – Sochınskoe avtojolyn qaıta jańartý, Jaltyr – Makınsk avtojolyn, Qalqutan aýylyna, Jambyl jáne basqa da eldi mekenderge kireberis joldaryn jóndeý jumystary júrgiziledi. Barlyǵy – 14 baǵyt.
Qostanaı oblysynda qarajat 22 baǵyt boıynsha joldardy, kópirlerdi jáne 10-ǵa jýyq sý ótkizgish qubyrdy jóndeýge jáne rekonstrýktsııalaýǵa jumsalady.
Soltústik Qazaqstan oblysynda 10 joldy, onyń ishinde Kókshetaý – Omby baǵytyndaǵy joldy jóndeý, sondaı-aq 22 shaqyrym sý ótkizgish qubyrlarǵa ortasha jóndeý jumystaryn júrgizý josparlanǵan.
Bólingen qarajat jergilikti atqarýshy organdarǵa turǵyndardyń qaýipsiz qozǵalysyn qamtamasyz etý úshin sý tasqynynan keıin búlingen jol bólikterin ýaqytyly qalpyna keltirýge múmkindik beredi.
Aıta keteıik, 2024 jylǵy 17 shildede QR Premer-Mınıstri Oljas Bektenov sý tasqynynan keıin turǵyn úılerdi jáne ınfraqurylymdy qalpyna keltirý máseleleri boıynsha keńes ótkizdi. Onyń barysynda Úkimet basshysy qalpyna keltirý jumystarynyń qarqynyn arttyryp, týyndaǵan máselelerdi jedel sheshý úshin adamdar men tehnıkany jumyldyrýdy tapsyrdy.
