Úkimet sý salasyndaǵy 16 negizgi jobany anyqtady

ASTANA. KAZINFORM – Premer-Mınıstrdiń orynbasary – Ulttyq ekonomıka mınıstri Nurlan Baıbazarov elimizdiń sý sharýashylyǵy júıesin belsendi qalpyna keltirýdiń bastalǵanyn habarlady.

«Kóktemde bolǵan sý tasqyny elimizdiń sý sharýashylyǵy júıesi ınfraqurylymynyń durys damymaǵanyn kórsetti. Biz 500 mlrd teńgeden astam ınvestıtsııany talap etetin 16 jobany anyqtadyq», — dedi vıtse-premer Primeminister.kz-ke bergen eksklıýzıvti suhbatynda.

Bul ınvestıtsııalardyń qarjylandyrý kózderi anyqtalǵan. Islam damý banki tarapynan jeńildetilgen qarjy tartylǵaly otyr. Qarajat uzaq merzimge jáne óte tómen mólsherlememen beriledi, bul atalǵan salada qordalanǵan máselelerdi sheshýge múmkindik beredi. Sý sharýashylyǵy júıesin jańartý sý qoımalary men sýarý arnalaryn salýdy, sondaı-aq qyzmetterdiń tehnıkalyq ınfraqurylymyn nyǵaıtýdy qamtıtyn bolady.

«Eń aldymen, Memleket basshysynyń tapsyrmasy boıynsha biz Tótenshe jaǵdaılar mınıstrliginiń júıesindegi tehnıkalar men quraldardy tolyq jańartamyz. Sý sharýashylyǵynda «Qazsýshar» júıesin qajetti tehnıkamen jabdyqtaımyz», - dep atap ótti mınıstr.

Sondaı-aq Nurlan Baıbazarov «Jasyl damý» qarajaty orman jáne sý sharýashylyǵy, tótenshe jaǵdaılar júıesi sekildi tehnıkamen jasaqtaýdy jáne olardy jańartýdy qajet etetin salalarǵa bólingenin atap ótti. Bul – 200 mlrd teńgeden astam qarajat. Jobalar búginde júzege asyrylyp jatyr, tehnıkanyń birinshi partııasy bıyl jetkiziledi.