Úkimet Stepnogor jáne Kókshetaý qalalarynyń jylý jelilerin jóndeýge 3,9 mlrd teńge bóldi
ASTANA. KAZINFORM – Memleket basshysynyń jylý-energetıkalyq ınfraqurylymdy jańǵyrtý jónindegi tapsyrmalaryn oryndaý sheńberinde Úkimet rezervinen Aqmola oblysynyń eki qalasy – Stepnogor pen Kókshetaýdaǵy ınjenerlik jeliler men jylý kózderiniń tozýyn tómendetý úshin 3,9 mlrd teńgeden astam qarajat bólindi. Bul týraly Úkimettiń baspasóz qyzmeti habarlady.
Tıisti Qaýlyǵa Premer-mınıstr Oljas Bektenov qol qoıdy.
Qarajattyń negizgi bóligi, shamamen 2,7 mlrd teńge, Stepnogor qalasyndaǵy uzyndyǵy 7,5 shaqyrym magıstraldyq jylý jelisin jóndeý jónindegi jobany aıaqtaýǵa baǵyttalmaq. Taǵy 1,2 mlrd teńge Kókshetaý qalasynyń №1 jáne №2 qazandyqtarynyń energetıkalyq qazandyqtaryn, jabdyqtary men júıelerin qalpyna keltirýge jumsalmaq.
Búgingi tańda Kókshetaý qalasyn jylýmen eki qazandyq qamtamasyz etip otyr, negizgi jylý kózi – AQ-2 qazandyǵy. Ótken jyly Úkimet rezervinen bólingen qarajat esebinen qalada keshendi tehnıkalyq jumystar júrgizildi, nátıjesinde jabdyqtardyń tozý deńgeıi 44%-dan 42%-ǵa tómendedi. Stepnogor qalasynda Úkimet rezervi esebinen 7,1 shaqyrym magıstraldyq jylý jelileri jańartyldy, nátıjesinde tozý deńgeıi 71,4%-dan 68%-ǵa qysqardy.
Atalǵan is-sharalardy júzege asyrý óńir turǵyndaryn jylýmen turaqty qamtamasyz etýge, jelilerdegi apatty jaǵdaılardy azaıtýǵa jáne bolashaq jylytý kezeńderiniń qalypty ótýin qamtamasyz etýge múmkindik beredi.
Jalpy Úkimettiń elimiz boıynsha qabyldaǵan sharalardyń nátıjesinde 2025 jyly 10 energoblokqa, 63 qazandyqqa jáne 39 týrbınaǵa kúrdeli jóndeý júrgizildi, 323 shaqyrym jylý jelileri qaıta jańartylyp, aýystyryldy, sondaı-aq 17 myń shaqyrym elektr taratý jelileri men 420 qosalqy stansa jóndeldi. Bul elektr stansalaryndaǵy jabdyqtardyń tozý deńgeıin 53%-ǵa, jylý jelileriniń tozý deńgeıin 50%-ǵa deıin tómendetti, al elektr stansalaryndaǵy tehnologııalyq buzýshylyqtar sany 15%-ǵa azaıdy.
Sondaı-aq, 8 JEO táýekel aımaqtarynan shyǵaryldy: beseýi – «qyzyldan» «saryǵa», taǵy úsheýi «sarydan» «jasylǵa» kóshirildi. Jekelegen jańǵyrtý josparlary bekitilip, jóndeý jumystaryn qarjylandyrý kúsheıtilýde.
Aıta ketelik Premer-mınıstrdiń orynbasary – Ulttyq ekonomıka mınıstri Serik Jumanǵarın Astanada jylýmen jáne sýmen qamtamasyz etý salasyndaǵy tarıfterdiń ósýine qatysty túsinik bergen edi.
