Úkimet SQO-daǵy jylý magıstrali qurylysyna 650 mln teńgege jýyq qarjy bóldi
ASTANA. KAZINFORM — Qarajat Petropavldyń 30 myńnan astam turǵynyn jylýmen qamtamasyz etetin magıstraldy jóndeýdi aıaqtaýǵa baǵyttalady, dep habarlaıdy Úkimettiń baspasóz qyzmeti.
Úkimet qaýlysymen rezervten Soltústik Qazaqstan oblysy Petropavl qalasyndaǵy jylý magıstraliniń qurylysyn aıaqtaýǵa shamamen 650 mln teńge bólindi. Júıeli jańǵyrtý Memleket basshysynyń Parlament palatalarynyń birlesken otyrysynda elimizdiń energetıkalyq jáne ınfraqurylymdyq áleýetin nyǵaıtý jóninde bergen tapsyrmalary aıasynda júzege asyrylyp jatyr. Tıisti qaýlyǵa Premer-mınıstr Oljas Bektenov qol qoıdy.
— Qarajat J.Jabaev — A.Shájimbaev — Novaıa — Y.Altynsarın kósheleri boıyndaǵy ýchaskelerdegi jylý jelisiniń qurylysyna baǵyttalǵan. 2026 jyly 1,4 shaqyrym demontajdalyp, jańa jylý jelileri tartylady. 2025 jyly 0,7 shaqyrym jylý jelileri jańartylǵan. Osylaısha, bólingen qarajatqa Petropavl qalasyndaǵy uzyndyǵy 2 shaqyrymnan asatyn № 2 magıstralin jóndeý jumystary aıaqtalady. Jobany júzege asyrý 80%-dan astam tozǵan magıstraldy aýystyrýǵa jáne 30 myńnan astam qala turǵynyn nemese 200-den astam kóppáterli úı men áleýmettik sala nysanyn jylýmen qamtý senimdiligin arttyrady, sondaı-aq qalanyń jylý jelileriniń tozý deńgeıin tómendetedi. Úkimet aldaǵy jylý berý maýsymyna daıyndyqty turaqty baqylaýda ustaýda, — delingen habarlamada.
QR Energetıka mınıstrliginiń málimetinshe, 2025 jyldan beri elektr stantsııalaryndaǵy 10 energııa blogyna, 63 qazandyq pen 39 týrbınaǵa kúrdeli jóndeý júrgizildi. Sonymen qatar 17 myń shaqyrym elektr taratý jelisi jańartylyp, 420 qosalqy stantsııa jańǵyrtyldy jáne eń kóp tozǵan 323 shaqyrym jylý jelisi aýystyryldy. Nátıjesinde elektr stantsııalary jabdyqtarynyń tozý deńgeıi 53%-ǵa, jylý jelileriniń tozý deńgeıi 50%-ǵa deıin tómendedi.
Budan buryn Ekibastuzda jańǵyrtylyp jatqan jylý magıstrali 300-den astam turǵyn úıdegi jylýdyń jaqsarýyna áser etetinin jazdyq.
