Úkimet SQO-daǵy qorǵanys bógetin rekonstrýktsııalaýǵa 1,4 mlrd teńge bóldi
ASTANA.KAZINFORM - Soltústik Qazaqstan oblysy Qyzyljar aýdany Teplıchnoe aýylyndaǵy qorǵanys bógetin rekonstrýktsııalaýǵa Úkimet rezervinen shamamen 1,4 mlrd teńge bólindi. Tıisti qaýlyǵa Premer-mınıstr Oljas Bektenov qol qoıdy.
Úkimet bul jumys Prezıdent Qasym-Jomart Toqaevtyń sý tasqynyna qarsy qurylystardy nyǵaıtý jónindegi tapsyrmalaryna sáıkes júrgizilip jatqanyn habarlady.
Rekonstrýktsııalaý jumysynyń maqsaty – qurylystyń beriktigin nyǵaıtý jáne eldi mekenniń tolyqqandy qorǵalýyn qamtamasyz etý. Bógetti tolyq rekonstrýktsııalaý jobasyna avtojoldardy qalpyna keltirý, temirbeton plıtalaryn tóseý, drenaj júıesi jáne abattandyrý kiredi. Barlyq is-shara aıaqtalǵannan keıin gıdrologııalyq nysannyń joǵarǵy deńgeıi 2024 jylǵy sý tasqynynyń eń joǵary deńgeıine teń deńgeıde belgilenedi.
Jobany júzege asyrý myńǵa jýyq halqy bar Teplıchnoe aýylyn sý tasqynynan qorǵaýdy qamtamasyz etedi.
Úkimet eldi mekenderdi sý tasqynynan qorǵaý jumystaryn júrgizip jatyr. Sý resýrstary jáne ırrıgatsııa mınıstrliginiń derekteri boıynsha alty óńirde – Aqmola, Aqtóbe, Batys Qazaqstan, Qostanaı, Pavlodar jáne Soltústik Qazaqstan oblystarynda gıdrotehnıkalyq qurylystardy qalpyna keltirý jáne salý boıynsha 57 joba, onyń ishinde 13 jańa nysan qurylysy júzege asyrylyp jatyr. Búgingi tańda 57 nysannyń 40-y aıaqtaldy, 221 shaqyrym qorǵanys bógetteri salynyp, nyǵaıtyldy, bul jumystyń 91%-y.
Aıta keteıik, Teplıchnoe aýylyndaǵy qorǵanys bógeti 1980 jyly paıdalanýǵa berilgen. Bastapqyda bógettiń uzyndyǵy 380 metr, ortasha eni 11 metr, ortasha bıiktigi 4 metr bolǵan.
2024 jylǵy sý tasqyny kezinde SQO Qyzyljar aýdanynyń aýmaǵynda jergilikti tabıǵı sıpattaǵy tótenshe jaǵdaı jarııalandy. Esil ózeniniń tasýy saldarynan Teplıchnoe aýylyndaǵy qorǵanys bógeti apatty jaǵdaıǵa tap boldy. 2024 jylǵy sý tasqynynan keıingi qalpyna keltirý jumystary kezinde bógettiń uzyndyǵy ulǵaıtyldy.
Aıta keteıik, «Kókaral» bógetin qalpyna keltirýge 13 myń tonna shoıtas jetkizilmegen.