Úkimet SQO-da aǵash óńdeý zaýytyn salý jónindegi ınvestıtsııalyq kelisimdi maquldady
ASTANA.KAZINFORM - Premer-mınıstr Oljas Bektenov tıisti qaýlyǵa qol qoıdy. Bul týraly Úkimettiń baspasóz qyzmeti habarlady.
Qazaqstan Úkimeti Ónerkásip jáne qurylys mınıstrligi men «Ultradecor Trading Kazakhstan» JShS arasynda Soltústik Qazaqstan oblysynda aǵash óńdeý óndirisin salý jobasy boıynsha ınvestıtsııalar týraly kelisimge qol qoıýdy maquldady.
Jalpy quny 70 mlrd teńge bolatyn joba 2026-2028 jyldary iske asyrylady. Ony iske qosý keminde 160 turaqty jumys ornyn qurýǵa, el ishinde aǵash óńdeýdi keńeıtýge, daıyn ónim óndirisin arttyrýǵa jáne óńirdiń ónerkásiptik áleýetin kúsheıtýge múmkindik beredi. Zaýyttyń óndiristik qýaty jylyna shamamen 600 tekshe metr aǵash-jańqaly plıtalar (DSP) jáne 20 mln sharshy metr lamınatsııalanǵan aǵash-jańqaly plıtalar (LDSP).
Kelisim qazaqstandyq óndirýshilerdiń taýarlaryn, shıkizatyn, jumystary men qyzmetterin mindetti túrde paıdalanýdy kózdeıdi. Investor daıyn ónimniń keminde 50%-yn ishki naryqqa baǵyttaýǵa mindetteledi. Kásiporyn jobalyq qýattyń 80%-yna shyqqannan keıin otandyq daıyn ónim eksportynyń kólemi jylyna 60 myń tekshe metrge deıin jetedi.
Óńirdi áleýmettik qoldaý boıynsha mindettemeler de bekitilgen. Sondaı-aq ınvestor jumyskerlerdi úzdiksiz oqytý júıesin engizýge jáne olardyń biliktiligin arttyrýdy qamtamasyz etýge mindetteledi.
Jobany iske asyrý aǵash óńdeý salasynyń damýyna, jergilikti mazmundy arttyrýǵa, jumyspen qamtýdy keńeıtýge jáne Qazaqstannyń óńdeý ónerkásibiniń eksporttyq áleýetin nyǵaıtýǵa yqpal etedi.
Aıta ketelik Úkimet kómir ónerkásibin damytý jaıyn pysyqtaıdy.
