Úkimet SQO aýyldaryn sýmen qamtýǵa qaıtarylǵan aktıvter esebinen 2,7 mlrd teńge bóldi
ASTANA. KAZINFORM - Qazaqstan Úkimeti Memleket basshysynyń áleýmettik ınfraqurylym nysandaryn salý jónindegi tapsyrmalaryn, onyń ishinde elge qaıtarylǵan aktıvter esebinen júzege asyrýdy jalǵastyryp jatyr.
Osy maqsatta Arnaýly memlekettik qordan Soltústik Qazaqstan oblysyndaǵy Presnov jáne Sokolov toptyq sý qubyrlaryn rekonstrýktsııalaýdy aıaqtaýǵa 2,7 mlrd teńge bólindi.
Presnov toptyq sý qubyryn rekonstrýktsııalaý jalpy sany 34,5 myń adam turatyn Esil, Mamlıýt jáne Jambyl aýdandaryndaǵy 43 eldi mekendi sýmen jabdyqtaýdy jaqsartýǵa múmkindik beredi.
Úkimettiń baspasóz qyzmeti habarlaǵandaı, búginde 171 shaqyrym magıstraldyq sý qubyry men taratý jelileri, sondaı-aq 46 shaqyrym aýylishilik sý jelileri tartyldy. Sýdy jınaqtaýǵa, taratýǵa jáne qajetti sý qysymyn qamtamasyz etýge arnalǵan qysym rettegish qurylystaryn salý jáne jańartý jumystary jalǵasyp jatyr.
Sokolov toptyq sý qubyryn rekonstrýktsııalaý jumystary Qyzyljar aýdanyndaǵy jalpy sany 4 myńnan astam adam turatyn 10 aýyldy qamtıdy. Joba aıasynda 59 shaqyrym taratý jelisi men 77 shaqyrym aýylishilik sý jelisi salynady.
Presnov jáne Sokolov sý qubyrlaryn paıdalanýǵa berý 2026 jyldyń sońyna josparlanǵan. Nátıjesinde júıeniń senimdiligi artyp, sý tasymaldaý kezindegi shyǵyndar qysqaryp, joba qamtyǵan eldi mekenderdiń turǵyndaryna aýyz sýdy jetkizý sapasy jaqsarady.
Soltústik Qazaqstan oblysynda elimizdegi eń uzyn toptyq sý qubyrlary jelisi ornalasqan. Onyń uzyndyǵy 3 myń shaqyrymnan asady jáne ol jalpy sany 175 myń adam turatyn 229 aýyldy sýmen qamtamasyz etedi.
2025 jyly Arnaýly memlekettik qordan atalǵan ınfraqurylymdy damytýǵa 45 mlrd teńgeden astam qarajat bólindi, bul 48 jobany qarjylandyrýǵa múmkindik berdi.
Aıta keteıik,2024 jyldan 2026 jylǵa deıingi aralyqta Arnaýly memlekettik qor qarajaty esebinen Úkimet jalpy somasy 610 mlrd teńge bolatyn 500-den astam áleýmettik jobany qarjylandyrýdy maquldady.Olardyń basym bóligi paıdalanýǵa berilgen.
Onyń ishinde jalpy somasy 226,5 mlrd teńge bolatyn 267 joba sý ınfraqurylymyn damytýǵa baǵyttalǵan.
Aıta keteıik, Shardaranyń 32 myń turǵyny qaıtarylǵan aktıvter esebinen taza aýyz sýǵa qol jetkizdi.
