Úkimet Şýche-Býrabaı kýrorttyq aımaǵyn damytýdyń 2029 jylǵa deıingi josparyn bekitti
ASTANA. KAZINFORM – Qazaqstan Premer-mınıstri Oljas Bektenov Şýche-Býrabaı kýrorttyq aımaǵyn damytýdyń 2025-2029 jyldarǵa arnalǵan keshendi josparyn bekitý týraly qaýlyǵa qol qoıdy. Bul týraly Úkimettiń baspasóz qyzmeti málim etti.

Qujat 137,2 mlrd teńgeni quraıtyn 118 sharany qamtıdy jáne týrıstik ınfraqurylymdy, kólik logıstıkasyn, tsıfrlyq sheshimderdi, qaýipsizdik júıelepin damytýǵa, sondaı-aq ınvestıtsııa tartýǵa baǵyttalǵan.
— Josparǵa sáıkes, demalys ornyn jańǵyrtý negizgi baǵyttardy, sonyń ishinde jyl boıy jumys isteıtin týrıstik nysandar salýdy, ekologııalyq jáne sporttyq týrızmdi damytýdy, jańa rekreatsııalyq aımaqtar qurylysyn qamtıdy. Atap aıtqanda, Qatarkól kóliniń janynda balalar ortalyqtaryn, sporttyq-saýyqtyrý keshenderin jáne jyl boıy akvapark uıymdastyrý qarastyrylyp otyr. Júkeı kóliniń mańynda kempıngter, glempıngter jáne jańa týrıstik baǵyttar ashylady, al Kishi Shabaqty kólinde jalǵa berý stansalary, qaıyq turaǵy, jaǵalaý ınfraqurylymy men jaǵajaılar bolady, — delingen habarlamada.
Qysqy demalys túrlerin damytý keńinen josparlanǵan, olardyń arasynda shańǵymen syrǵanaý erekshe suranysqa ıe. Sporttyq jabdyqtardy jalǵa beretin, tamaqtaný orny men kádesyı dúkenderi bar shańǵy bazasyn uıymdastyrý kózdelýde.
Kýrorttyq aımaqqa qol jetkizýdiń yńǵaıly bolýyn qamtamasyz etý úshin kólik ınfraqurylymy, onyń ishinde vızıt-ortalyqtary bar kópdeńgeıli turaqtar jáne tamaqtaný pýnktteri salynady.
Jospardy iske asyrý kelýshi týrıster sanynyń 35 myńnan 94 myń adamǵa deıin ulǵaıýyna, týrızm salasyndaǵy jumyspen qamtý kórsetkishiniń 22 myńnan 32,5 myń adamǵa deıin ósýine jáne 22,7 mlrd teńge mólsherinde jeke ınvestıtsııalar tartýǵa ákeledi dep kútilýde. Óńir ekonomıkasyndaǵy týrızm úlesi 1,4%-dan 3,5%-ǵa deıin ulǵaıýy tıis.
Kýrorttyq aımaqty damytý Qazaqstannyń óńirdiń týrıstik kartasyndaǵy ustanymyn nyǵaıtady, sondaı-aq ishki týrızmniń tartymdylyǵyn arttyrady.
Eske sala keteıik, buǵan deıin Bektenov Alataý qalasynda ınvestıtsııalyq jobalardy iske asyrý keleshegin talqylaǵanyn jazǵan bolatynbyz.