Úkimet ShQO-daǵy respırator zaýytyn qaıta jandandyrmaqshy

ASTANA. KAZINFORM – Premer-mınıstr Oljas Bektenov Májilis depýtattarynyń saýalyna joldaǵan jaýapta Shyǵys Qazaqstan oblysyndaǵy respırator shyǵaratyn zaýytty qaıta jandandyrýdyń usynystary ázirlenip jatqanyn málim etti.

Depýtattyq saýalda Rıdder jáne Altaı qalalarynyń mańyndaǵy qorǵasyn men myrysh óndiretin kenishterdiń sarqylyp bara jatqany másele etip kóterilgen.

- Rıdder jáne Altaı qalalarynyń mańynda memlekettik jer qoınaýy qoryn basqarý baǵdarlamasyna engizilgen aýmaqtyń aýdany 8 675,359 sharshy shaqyrym bolady (Rıdder q. – 1832,626 sharshy shaqyrym; Altaı q. – 6842,733 sharshy shaqyrym). ShQO-nyń mıneraldyq-shıkizat bazasyn tolyqtyrý úshin 2020 jyldan 2024 jylǵa deıin memlekettik geologııalyq zertteýler júrgizildi. Osylaısha «Vostochno-Starkovskıı» teliminde (Rıdderden 22 shaqyrym jerde) 8 myń tonna mys, 4 myń tonna qorǵasyn, 27,2 myń tonna myrysh bar dep boljanyp otyr. Al Altaı qalasynan 264,4 shaqyrym jerdegi «Mırolıýbovskıı» teliminen 619,5 tonna volfram, «Kýneoı» teliminen (Altaı q. 109 shaqyrym jerde) berılıdiń 20,6 myń tonna qory bar dep baǵalanǵan, - dep jazylǵan jaýapta.

Premer-mınıstr Altaı aýdanyndaǵy Serebrıansk qalasyn damytý úshin sondaǵy qala quraýshy kásiporyndy qaıta jandandyrý josparda bar ekenin aıtady.

- Bıylǵy qańtar aıynda «Ertis» áleýmettik kásipkerlik korporatsııasynyń delegatsııasy Qaraǵandy oblysynyń Saran qalasyndaǵy ındýstrııalyq aımaqqa baryp, aımaqtyń damý barysymen tanysty. Búgingi tańda Altaı aýdanyndaǵy Serebrıansk qalasyn damytý jónindegi usynystar ázirlenip jatyr. ıAǵnı, Serebrıansk organıkalyq emes óndirister zaýytyn qaıta jandandyrý josparda bar, - dep jazady Oljas Bektenov.

Atalǵan zaýyt táýelsizdik jyldarynda respırator men óndiristik aýa súzgilerin shyǵarǵan. Al keńes zamanynda tank pen brondy tehnıkanyń súzgilerin óndirdi. Al Chernobyl atom stansasyndaǵy apattan keıin gazǵa qarsy tumyldyryq pen respırator shyǵarýǵa kóshken. Keńes bıligi qulaǵannan keıin zaýyt Qorǵanys mınıstrligine baǵynyshty aktsıonerlik qoǵam bolyp tirkeldi. Keıin jekeshelendirilip, qoldan-qolǵa ótti. Ashyq derek kózderinde zaýyt ıeleriniń ishinde Muhtar Áblıazovtiń de bolǵany aıtylady. 2010 jyly kásiporyn Problemalyq kredıt qoryna ótti. Sodan beri zaýyt birde jumys istep, birde toqtap tur. Ashyq derek kózderindegi málimet boıynsha 2024 jyly kásiporyn 33 296 teńge salyq tólegen.

Eske salsaq, el aýmaǵynda qazyp alynatyn altyn qory 522 tonnaǵa artqany málim bolǵan edi.