Úkimet ishki óndiristi arttyrý arqyly azyq-túlik baǵasyn turaqtandyrmaq
ASTANA. KAZINFORM — Shildedegi úsh aptanyń qorytyndysy boıynsha jyl basynan beri alǵash ret áleýmettik mańyzy bar azyq-túlik baǵasynyń ortasha ındeksiniń -0,1%-ǵa tómendeýi tirkeldi, dep habarlaıdy Úkimettiń baspasóz qyzmeti.
Bul derek Premer-mınıstrdiń orynbasary — ulttyq ekonomıka mınıstri Serik Jumanǵarınniń tóraǵalyǵymen ótkizilgen áleýmettik mańyzy bar azyq-túlik taýarlary men ınflıatsııa baǵasyn turaqtandyrý máselesi jónindegi keńeste aıtyldy.
Maýsym qorytyndysy boıynsha eldegi jyldyq ınflıatsııa 10,3% (mamyrda 10,4%). Ortasha respýblıkalyq deńgeıden joǵary jyldyq ınflıatsııa deńgeıi elimizdegi 11 óńirde baıqaldy. Eń joǵary kórsetkish Ulytaý, Soltústik Qazaqstan, Jetisý men Aqmola oblysynda tirkeldi.
Saýda jáne ıntegratsııa birinshi vıtse-mınıstri Aıjan Bıjanova habarlaǵandaı, shilde men tamyz dástúrli túrde negizgi azyq-túlik baǵasyn maýsymdyq turaqtandyrý kezeńi. Sońǵy aptada qyzanaq (-15,1%), qııar (-18,2%), sábiz (-5,2%) jáne jumyrtqa (-2,4%) aıtarlyqtaı arzandady. Sonymen qatar, keıbir et ónimderine, qoı etine (2%), jylqy etine (1,3%) jáne tartylǵan etke (0,6%) baǵa ósimi saqtalyp otyr.
Osyǵan baılanysty Serik Jumanǵarın Úkimettiń odan arǵy is-qımylyn aıqyndaý úshin óndiris kólemin, ishki tutyný men eksporttyq jetkizilimdi eskere otyryp, et jáne et ónimderin óndirý naryǵyna egjeı-tegjeıli taldaý júrgizýdi tapsyrdy.
Baǵany odan ári turaqtandyrýdyń negizgi faktorynyń biri ishki óndiristi ulǵaıtý jáne otandyq óndirýshilerdi memlekettik qoldaý sharalaryn keńeıtý. Jyl sońyna deıin ósimdik maıyn tazartatyn úsh zaýytty paıdalanýǵa berý josparlanyp otyr. Bul ishki naryqtaǵy kúnbaǵys maıyn ulǵaıtýǵa múmkindik beredi.
Jaqyn arada nan pisirý salasynyń 40 kásiporny úshin elektr energııasyna jeńildetilgen tarıfti kózdeıtin normatıvtik quqyqtyq akt kúshine enedi. Bul shara óndiristik shyǵyndy tómendetýge múmkindik berip, nan-toqash óniminiń turaqty baǵasyn saqtaýǵa yqpal etedi.
Budan basqa, «Qazaqstan temir joly» UK» AQ el ishinde áleýmettik mańyzy bar azyq-túlik taýarlarynyń temir jol tasymalyna 70% jeńildik usynady. Jergilikti atqarýshy organdarǵa osyndaı tasymaldarǵa monıtorıng júrgizýdi jáne baǵanyń negizsiz ósýine jol bermeý boıynsha qarsy mindettemelerdi qoldaýdyń osy sharasyn alýshylardyń oryndaýyn baqylaýdy qamtamasyz etý tapsyryldy.
Keńesti qorytyndylaı kele, Serik Jumanǵarın memlekettik organdar men ákimdikterge naryq qatysýshylarymen ataýly jumysty kúsheıtýdi tapsyrdy.
— Baǵanyń aıtarlyqtaı ósýiniń árbir jaǵdaıy boıynsha jetkizilimniń barlyq tizbegin taldaý jáne qymbattaýdyń sebebin joıý qajet. Beıindi mınıstrlikter men ákimdikterge iri kóterme jetkizýshilermen jáne ımporttaýshylarmen kezdesýler ótkizýdi, qoldanystaǵy kedergilerdi aıqyndaýdy jáne baǵa turaqtylyǵyn qamtamasyz etý boıynsha qarsy mindettemelerdi mindetti túrde qabyldaǵan kezde memlekettik qoldaýdyń qajetti sharalaryn ázirleýdi tapsyramyn. Dál osyndaı júıeli jumysty tıisti naryqtardyń erekshelikterin eskere otyryp, azyq-túlikke jatpaıtyn taýarlar men aqyly qyzmetter salasynda da uıymdastyrý qajet. Árbir memlekettik organ óz quzyreti sheginde kózdelgen sharalardyń iske asyrylýyn qamtamasyz etýi tıis, — dep atap ótti Serik Jumanǵarın.
Budan bólek, vıtse-premer ǵylym jáne joǵary bilim, sondaı-aq aǵartý mınıstrlikterimen bilim berý qyzmetteriniń qunyn turaqtandyrý máseleleri boıynsha keńes ótkizdi.
Osydan buryn ShQO-da azyq-túlik baǵasyn negizsiz kótergen 50-ge jýyq kásipker jaýapqa tartylǵanyn jazdyq.
