Úkimet sheshimderi qysqa merzimde halyqtyń áleýmettik jaǵdaıyn qorǵaýǵa baǵyttalǵan – Baýyrjan Ysqaqov
ASTANA. KAZINFORM – Úkimet qabyldaǵan sheshimder orta jáne uzaq merzimde ekonomıkalyq belsendilikti arttyrýǵa baǵyttalǵan. Mundaı pikirdi ekonomıst Baýyrjan Ysqaqov bildirdi.
- Prezıdent tapsyrmasyna sáıkes Úkimettiń qabyldaǵan sharalaryn eldegi makroekonomıkalyq turaqtylyqty saqtaýǵa jáne halyqtyń áleýmettik jaǵdaıyn qoldaýǵa baǵyttalǵan dep aıtýǵa bolady. Bul sheshimder ekonomıkalyq reformalardyń yqtımal teris saldaryn jumsartýǵa múmkindik beredi. Eń aldymen - baǵany tejeý men áleýmettik turaqtylyq. Benzın men dızel otynyna, sondaı-aq kommýnaldyq tarıfterge moratorıı engizý – qysqa merzimdi ınflıatsııalyq qysymdy azaıtýdyń naqty qadamy. Energııa tasymaldaýshylar men kommýnaldyq tarıfter baǵanyń jalpy deńgeıine tikeleı áser etetindikten bul sheshim halyqtyń kúndelikti shyǵyndaryn jeńildetip, áleýmettik turaqtylyqty saqtaýǵa sep bolady. Alaıda, bul sharalar ýaqytsha sıpatta ekenin eskerýimiz qajet. Tarıfterdi uzaq ýaqyt tejep ustaý ınfraqurylymnyń tozýyna jáne ınvestıtsııa tapshylyǵyna ákelýi múmkin. Sondaı-aq Úkimettiń turǵyn-úı kommýnaldyq sharýashylyq salasynda josparly jóndeý jumystaryn toqtatpaý týraly talaby da oryndy sheshim dep aıtýǵa bolady,- dedi ekonomıst.
Onyń aıtýynsha, aýyl sharýashylyǵy óndirýshilerin qarjylandyrý kólemin 2 ese arttyrý ınflıatsııany tejeýdiń ornyqty joly dep aıtýǵa bolady. Bul qadam ishki naryqty óz ónimderimizben qamtamasyz etip, áleýmettik mańyzy bar azyq-túlik taýarlarynyń baǵasyn ustap turýǵa múmkindik beredi. Sonymen qatar deldaldyq tizbekti qysqartý jáne saýda ústemesin baqylaý aryly qalyptasýyna da áserin tıgizedi.
- Jańa Salyq kodeksin engizý kezinde shaǵyn jáne orta bızneske aýyrtpalyq túsirmeý reformanyń áleýmettik baǵytyn kórsetedi. Salyqtyq tekserýlerdi alyp tastaý, aıyppuldardy joıý jáne ákimshilendirýdi jeńildetý bızneske tyń serpin beredi. Bul kásipkerlerdiń kóleńkeden shyǵýyna, jumys oryndarynyń saqtalýyna, jańa bastamalardyń kóbeıýine de áser etedi,- dedi ol.
Sondaı-aq ekonomıst bazalyq mólsherlemelerdiń joǵary bolýyna baılanysty ıpoteka naryǵynda báseńdeý baıqalǵanyna nazar aýdartty.
- Úkimettiń turǵyn úı qurylys jınaq júıesin qoldaý týraly sheshimi halyqtyń baspanaǵa qoljetimdiligin arttyrýǵa baǵyttalǵan. Nesıe kólemin 2 ese ulǵaıtý jáne «Áskerı baspana» baǵdarlamasyn qaıta iske qosý turǵyn úı naryǵyn jandandyryp, qurylys salasyna serpin beredi. Bul ekonomıkanyń mýltıplıkatıvti áseri bar sektory ekenin eskersek, sheshim strategııalyq turǵyda durys. Al avtokólik naryǵyna qatysty aıtar bolsaq, jeńildetilgen avtonesıe men lızıng tetigin engizý halyqtyń tólem qabiletin saqtaýǵa, otandyq avtoóndiristi qoldaýǵa baǵyttalǵan. Bul qadam óndiris kólemin arttyryp, jumys oryndaryn saqtaýǵa múmkindik beredi. Jalpy, Úkimettiń qabyldanǵan sheshimderi qysqa merzimde halyqtyń áleýmettik jaǵdaıyn qorǵaýǵa, al orta jáne uzaq merzimde ekonomıkalyq belsendilikti arttyrýǵa baǵyttalǵan, - dedi Baýyrjan Ysqaqov.
Aıta keteıik, Prezıdent tapsyrmasy boıynsha Úkimet makroekonomıkalyq turaqtylyqty qamtamasyz etý jáne ekonomıkalyq reformalardyń teris saldaryn barynsha azaıtý baǵytynda birqatar sheshim qabyldady.