Úkimet sharýalarǵa túsetin qarjylyq júktemeni azaıtýdy tapsyrdy
ASTANA. KAZINFORM – Premer-mınıstr Oljas Bektenov agroónerkásip keshenin qoldaý boıynsha qosymsha sharalardy qarastyryp, sharýalarǵa túsetin qarjylyq júktemeni azaıtýdy tapsyrdy.
Úkimet otyrysynda Premer-mınıstr astyq tasymaldaýǵa baılanysty shyǵyndardy qosymsha qarjylandyrý qajettigin atap ótti.
– Sharýalarǵa qarjylyq júktemeni azaıtý maqsatynda Qarjy jáne Aýyl sharýashylyǵy mınıstrlikteri astyq tasymaldaýǵa baılanysty shyǵystardy qosymsha qarjylandyrý máselesin sheshýi qajet, – dedi Oljas Bektenov.
Sonymen qatar, mal jáne ósimdik sharýashylyǵy salalary boıynsha qaryzdarǵa kepildik berý quralyn iske qosý úshin Aýyl sharýashylyǵy, Qarjy, Ulttyq ekonomıka mınıstrlikterine jáne «Báıterek» holdıngine qajetti qarajat kózderin qarastyrý tapsyryldy.
Premer-mınıstr qarjy resýrstarynyń qoljetimdiligin keńeıtý qajettigin de atap ótti. Osy maqsatta áleýmettik-kásipkerlik korporatsııalar arqyly agroónerkásip kesheni sýbektilerin ınvestıtsııalyq jobalar men aınalym qarajatyn qarjylandyrý múmkindigin qarastyrý usynyldy.
Osyǵan baılanysty Aýyl sharýashylyǵy jáne Ulttyq ekonomıka mınıstrlikterine Básekelestikti qorǵaý jáne damytý agenttigimen birlesip, eki apta ishinde Úkimet qaýlysyna tıisti ózgerister engizý tapsyryldy.
Aıta keteıik, Oljas Bektenov qurylys salasyndaǵy sheshimin tappaǵan máselelerdi atady.
