Salyq-bıýdjet júıesin saýyqtyrý úshin keshendi sharalardy júzege asyrý qajet - Bektenov
ASTANA. KAZINFORM – Premer-mınıstr Oljas Bektenov Úkimettiń keńeıtilgen otyrysynda salyq saıasatynyń jańa baǵytyna toqtaldy.
- Bizde «damý bıýdjetiniń» kólemi jetkiliksiz. Damyǵan elderde ol barlyq memlekettik shyǵystyń 25%-yna jetedi. Al bizde – 8%. ıAǵnı, 26 trln teńgege jýyq respýblıkalyq bıýdjettiń nebári 2 trln teńgesi ǵana damýǵa jumsalady. Qalǵanynyń barlyǵy – aýqymdy bóligin áleýmettik shyǵystar quraıtyn aǵymdaǵy bıýdjet.
Ekonomıkalyq damýdyń negizi bolatyn elektr jáne jylý energetıkasy, sý sharýashylyǵy, gaz tasymaldaý júıeleri, jol, ınjenerlik jeliler men ınfraqurylym salalaryna jetkilikti qarajat bólinbeı keledi. Damý ınstıtýttary da qarjylandyrýmen tolyq qamtamasyz etilmeı otyr, - dedi ol.
Aıtýynsha, mundaı jaǵdaıda ósimniń joǵary qarqynyn turaqty qamtamasyz etý óte qıyn.
- Salyq-bıýdjet júıesin saýyqtyrý úshin keshendi sharalardy júzege asyrý qajet. Qazirgi salyq júıesi memleketke qajetti ınvestıtsııa kólemin qamtamasyz ete almaıdy. Sondaı-aq ol kásipkerlerge qatysty da ádiletsiz salyq júıesi retinde qalyptasyp otyr. Negizgi salyq júktemesi eńbekaqy tóleý qoryna, ıaǵnı taýardyń ózindik qunyna túsedi. Kásipker taýar sórege túspeı turyp, salyqtyń aýqymdy bóligin tóleýge májbúr bolady. Úkimet salyqty eńbekaqydan satylymǵa qaıta bólýdi qoldap otyr. Bul bizdiń kásiporyndardyń básekege qabilettiligin arttyryp, olar úshin qajetti qarjylyq qor jasaqtaýǵa jol ashady. Eńbekaqy tóleý qoryna túsetin júktemeniń azaıýy bızneske jumysshylardyń jalaqysyn kóbeıtýge múmkindik beredi, - dedi Oljas Bektenov.
Úkimet basshysynyń sózinshe, bul ózgeristerden keıin paıda bolatyn qosymsha salyq túsimderi ekonomıkalyq ósýdi yntalandyrýǵa, ınfraqurylymdy ozyńqy damytýǵa, basym salalardaǵy perspektıvaly bıznes-jobalardy qoldaýǵa baǵyttalady.
Sondaı-aq, Bektenov 2024 jyly ekonomıka 4,8 paıyzǵa óskenin, tarıf saıasatyna qatysty baǵanyń kúrt qymbattaýyna jol berilmeıtinin aıtqan bolatyn. Sonymen qatar, jýyqta alǵashqy AES qurylysy týraly kelisimderge qol qoıylatynyn da atap ótken edi.
Aıta keteıik elordada Prezıdent Qasym-Jomart Toqaevtyń tóraǵalyǵymen Úkimettiń keńeıtilgen otyrysy ótip jatyr.