Úkimet saǵaty: kommýnaldyq tarıfter lımıt boıynsha ǵana ózgeredi
ASTANA. KAZINFORM – Ulttyq ekonomıka mınıstriniń orynbasary Arman Qasenov Senattaǵy Úkimet saǵatynda kommýnaldyq ınfraqurylymdy jańǵyrtýǵa baǵyttalǵan ınvestıtsııalyq jobalar tarıfti ınflıatsııa deńgeıinde ǵana ósiretinin aıtty.
- Energetıka jáne kommýnaldyq sektordy jańǵyrtýdyń ulttyq jobasy kommýnaldyq ınfraqurylymnyń tozý kórsetkishin aıtarlyqtaı azaıtady. Tarıf máselesi ulttyq jobany ázirlegen kezde egjeı-tegjeıli talqylanǵan. Investıtsııalyq baǵdarlamanyń tarıfke áserin azaıtý úshin jobalardy 20 jylǵa deıingi merzimmen qarjylandyrý kózdelgen. Osylaısha ınvestıtsııalyq baǵdarlama 20 jylǵa tarqatylǵan. Ekinshiden, syıaqy mólsherlemesi 10%-ǵa deıin tómendetilgen. Bul tarıfterdiń tym jyldam ósýine jol bermeıdi. 10% degen qazirgi ınflıatsııadan da tómen, - dedi ol.
Arman Qasenov memleket tarıf máselesine úlken mán berip otyrǵanyn aıtty.
- Tarıf halyqtyń shyǵynyn ǵana emes, ınflıatsııany da arttyrady. Sondyqtan tarıfke lımıt qoıýdyń máni bar. Tipti Úkimet-Ulttyq bank-Qarjy naryǵyn retteý jáne damytý agenttigi úshtiginiń birlesken áreketteri baǵdarlamasynda da tarıfterdiń lımıtin bekitý qarastyrylǵan. Sondyqtan tarıf máselesine muqııat nazar aýdaryp otyrmyz. Tarıftiń kenet jáne úlken kólemde ósýine jol bermeıtin sharalar qabyldanǵan.
Mysaly, abonementter sany az qalalarda baǵdarlama qarjysy tarıfke tikeleı áser tıgizýi múmkin. Mundaı qalalarda ınvestıtsııalyq baǵdarlamanyń bir bóligi bıýdjet esebinen qarjylandyrylady. Osy arqyly tarıftiń ósimin ustaımyz, - dedi ol.
Sondaı-aq, ol «Báıterek» 5 jylda syrttan 20 trln teńge qaryz alatynyn málim etti.
