Úkimet Rıdderdiń jylý jelilerin jóndeý úshin rezervten 2,4 mlrd teńgeden astam qarajat bóldi
ASTANA. KAZINFORM – Memleket basshysy Qasym-Jomart Toqaevtyń tapsyrmasy boıynsha Úkimet elimizdiń jylýmen jabdyqtaý júıesin keshendi túrde jańǵyrtý jumystaryn júrgizip jatyr. QR Premer-Mınıstri Oljas Bektenov Rıdderdegi jumystardy kúsheıtý úshin Úkimet rezervinen qosymsha qarajat bólý týraly qaýlyǵa qol qoıdy.
Ótken jyly Rıdderdiń jylý jelilerinde júrgizilgen jóndeý-qalpyna keltirý jumystary olardyń tozý deńgeıin 78,8%-ǵa deıin tómendetýge múmkindik berdi. Alaıda, bul turǵyndardy jylýmen úzdiksiz qamtamasyz etý úshin áli de jetkiliksiz. Jalpy alǵanda, ótken jylytý maýsymynda jylý jelilerinde 25 tehnologııalyq buzýshylyq faktisi tirkeldi, sonyń saldarynantutynýshylar úshin shekteýler engizildi. Keıinge qaldyrýǵa bolmaıtyn qajetti shuǵyl jumystardy eskere otyryp, QR Úkimeti rezervinen Rıdder qalasynyń «Vodokanal» ShJQ MKK jylý jelilerin kúrdeli jóndeýge 2,4 mlrd teńgeden astam qarajat bóldi.
Bul olardyń tozý deńgeıin jaramdy kórsetkishterge deıin jetkizýge jáne qysqy kezeńge daıyndyǵyn qamtamasyz etýge múmkindik beredi. 50-den astam ýchaskede jumystar júrgizilmek.
Esterińizge sala keteıik, bir aıdan az ýaqyt buryn QR Premer-Mınıstri Kentaý, Rıdder jáne Qyzylorda qalalarynyń jylý kózderin rekonstrýktsııalaýǵa qarajat bólý týraly qaýlylarǵa qol qoıǵan bolatyn. Atap aıtqanda, Rıdder jylý elektr ortalyǵynyń tehnologııalyq jabdyqtary men ınfraqurylymyna kúrdeli jóndeý jumystaryn júrgizýge 4,9 mlrd teńge bólindi.
Jalpy alǵanda, jylýmen jabdyqtaý júıesin jańǵyrtý jumystary aıasynda Astana, Almaty, Shymkent, Atyraý, Óskemen, Qaraǵandy, Aqtaý, Taraz, Petropavl, Pavlodar, Jezqazǵan, Aqtóbe, Ekibastuz, Stepnogorsk, Rýdnyı, Balqash jáne Aqsý qalalarynda 10 energııa blogyn, 55 qazandyqty jáne 45 týrbınany jóndeý josparlanyp otyr.
Respýblıkanyń jylý kózderi men jylý jelilerin keshendi túrde jańǵyrtý máselesi QR Úkimetiniń turaqty baqylaýynda.
