Úkimet rezervinen Atyraý oblysyndaǵy joldardy qalpyna keltirýge shamamen 5,9 mlrd teńge bólindi

ASTANA. KAZINFORM – Atyraý oblysyndaǵy 8 jol ýchaskesin salýǵa jáne jóndeýge Úkimet rezervinen qarjy bólindi. Tıisti qaýlyǵa Premer-Mınıstr Oljas Bektenov qol qoıdy, dep habarlaıdy Úkimettiń baspasóz qyzmeti.

Qujatta sý tasqyny saldarynan zardap shekken joldardy qalpyna keltirýge Atyraý oblysynyń bıýdjetine aýdarý úshin Úkimettiń tótenshe rezervinen QR Kólik mınıstrligine shamamen 5,9 mlrd teńge bólý qarastyrylǵan.

Atalǵan qarajattyń 4,6 mlrd teńgesi oblystyq mańyzy bar avtojoldardyń jeti ýchaskesin, onyń ishinde, «Inder – Qarabaý – Saǵyz», Qarabaý kentine kirme joldar, «Sarytoǵaı – Mahambet», «Atyraý – Inder», sondaı-aq Qulsary qalasyndaǵy jaıaý júrginshiler jolyn qalpyna keltirýge baǵyttalady.

Sý tasqyny saldarynan zardap shekken «Inder – Qarabaý – Mııaly – Saǵyz» avtojolyndaǵy kópir men sý ótkizý qubyrlardyń qurylysyna shamamen 1,3 mlrd teńge bólinedi. Aıta keteıik, sý tasqyny 11 jol ýchaskesinde eleýli qıratýlarǵa ákelip, bes ýchaskede sý ótkizgish qubyrlarǵa zaqym keltirdi.