Úkimet rezervin paıdalaný qaǵıdalary ózgerdi
ASTANA. KAZINFORM – Úkimettiń jáne jergilikti atqarýshy organdardyń rezervterin bólý jáne paıdalaný qaǵıdalaryna ózgerister engizildi. Qaýlyǵa 2026 jylǵy 21 qazanda qol qoıyldy.
Jańa qaǵıdalarǵa sáıkes, shuǵyl shyǵyndardy qarjylandyrý úshin rezervten qarajat birneshe jaǵdaıda bólinýi múmkin. Atap aıtqanda, qarjylandyrý Bıýdjet kodeksiniń 18-babynyń 1-tarmaǵyna sáıkes júzege asyrylýǵa tıis. Sonymen qatar qarajatqa degen qajettilik aǵymdaǵy qarjy jylynda týyndaýy jáne bıýdjettik baǵdarlama ákimshisiniń ótken kezeńderdegi mindettemelerine baılanysty bolmaýy kerek.
Sondaı-aq elordanyń, oblystardyń jáne respýblıkalyq mańyzy bar qalalardyń jergilikti atqarýshy organdary rezervteriniń qarajatyn kommýnaldyq menshiktegi energııa óndirýshi uıymdardyń zalaldary men bereshegin óteýge baǵyttaý múmkindigi jeke qarastyrylǵan. Bul norma ońaltý rásiminen ótip jatqan, sonymen qatar elektr jáne jylý energııasyn óndiretin ári teńgeriminde 20-dan astam jylý kózi bar kásiporyndarǵa qatysty qoldanylady.
Ózgerister bólingen qarajattyń jumsalýy týraly eseptilikke qoıylatyn talaptardy da qamtıdy. Qarjy jyly aıaqtalǵannan keıin bıýdjettik baǵdarlamalardyń ákimshileri qarajat qaı rezervten bólingenine qaraı bıýdjettiń atqarylýy jónindegi ortalyq nemese jergilikti ýákiletti organdarǵa esep berýge mindetti.
Esepterde qarajattyń qandaı maqsatqa bólingeni jáne ony paıdalaný nátıjesinde qandaı kórsetkishterge qol jetkizilgeni kórsetilýge tıis. Budan bólek, qarjylandyrýdyń ózge kózderi bolmaýynyń sebepteri negizdelip, tıisti shyǵyndardy bıýdjetti qalyptastyrý kezinde nelikten aldyn ala qarastyrý múmkin bolmaǵany túsindirilýi qajet.
Jańa qaǵıdalar 2026 jylǵy 3 qarashadan bastap qoldanysqa engiziledi.
Eske sala ketsek, 29 qarashada elimizde kezekten tys máslıhat saılaýy ótedi. Saıası naýqanǵa Úkimet rezervinen qarjy bólinedi.
