Úkimet respýblıkalyq bıýdjettiń atqarylý barysyna nazar aýdarady
ASTANA. KAZINFORM — Búgin Úkimet otyrysy ótedi. Onda Mınıstrler kabınetiniń músheleri 2026 jylǵy qańtar-maýsym aıyndaǵy áleýmettik-ekonomıkalyq damý qorytyndysy men respýblıkalyq bıýdjettiń atqarylý barysyn talqyǵa salady.
Otyrystyń kún tártibine shyǵarylǵan másele qaralyp bolǵannan keıin, BAQ ókilderine baspasóz máslıhaty uıymdastyrylady. Onda QR ulttyq ekonomıka vıtse-mınıstri Arman Qasenov, QR ónerkásip jáne qurylys vıtse-mınıstri Qýandyq Qajkenov jáne QR aýyl sharýashylyǵy vıtse-mınıstri Azat Sultanov tilshiler suraǵyna jaýap beredi.
Aıta keteıik, buǵan deıin Úkimet 2025 jylǵy respýblıkalyq bıýdjettiń atqarylýy týraly esep berip, ol ótken aıda Májilistiń jalpy otyrysynda talqylanǵan edi.
Qarjy mınıstri Mádı Takıevtiń málimdeýinshe, byltyr respýblıkalyq bıýdjet shyǵystary 99%-ǵa oryndalyp, 25,5 trln teńge boldy.
Úkimet tarapynan barlyq áleýmettik mindetteme oryndaldy. Óńirlerdi qoldaýǵa 7,7 trln teńge baǵyttalǵan bolsa, al áleýmettik salaǵa 9,3 trln teńge jiberildi.
Sonymen qatar, ulttyq jobalar aıasynda 198 mekteptiń, jáne 655 densaýlyq saqtaý obektisiniń qurylysy aıaqtaldy. 10 myńnan astam stýdent úshin 30 jataqhana paıdalanýǵa berildi.
Odan bólek, byltyr barlyq qarjylandyrý kózi esebinen 20,1 mln sharshy metr turǵyn úı paıdalanýǵa berildi. Halyqtyń áleýmettik osal toptary úshin 5 141 turǵyn úı satyp alyndy.
Injenerlik ınfraqurylymdy damytý jónindegi jumystar da jalǵasyp keledi. 980 shaqyrym ınjenerlik — kommýnıkatsııalyq ınfraqurylym jelisi salyndy. Sýmen jabdyqtaý jáne sý burý júıeleriniń 6,3 myń shaqyrym jelisi salyndy jáne jóndeldi.
Eske salaıyq, buǵan deıin 2025 jyly bıýdjet kirisine teris áser etken salalar atalǵan edi.
