Úkimet iri kommertsııalyq kontsertterdiń kúzetin jeke kompanııalarǵa berýden bas tartty
ASTANA. KAZINFORM – Premer-mınıstr Oljas Bektenov Májilis depýtatynyń saýalyna joldaǵan jaýapta iri kommertsııalyq kontsertter men shoý-bıznes is-sharalarynyń kúzetine nege bıýdjetten qarjylandyrylatyn polıtsııa qyzmetkerleri men Ultty ulan sarbazdary tartylatynyn túsindirdi.
- Halyqaralyq tájirıbede kommertsııalyq is-sharalardaǵy qaýipsizdikti jeke kúzet uıymdary qamtamasyz etetin tásil qoldanylady. Al polıtsııa tek memlekettik jáne qoǵamdyq-saıası oqıǵalardy qorǵaý úshin nemese tótenshe jaǵdaılar týyndaǵan kezde qosylady. Alaıda eldiń jeke kúzet qurylymdarynyń áleýeti buqaralyq is-sharalardyń qaýipsizdigin qamtamasyz etý úshin qoıylatyn talaptarǵa tolyq jaýap bermeıdi. Ásirese adamdardyń kóp jınalýy, sondaı-aq terrorıstik aktilerdi tejeý jaǵdaılarynda kásibı daıarlyq deńgeıi men praktıkalyq jumys tájirıbesiniń jetkiliksizdigi, is-qımyldardy baqylaý, baılanystyrý jáne úılestirýdiń zamanaýı quraldarymen jaraqtandyrý deńgeıiniń tómendegi, jedel jaǵdaı qıyndaǵan kezde qosymsha kúshter men quraldardy shuǵyl tartýǵa múmkindikterdiń joqtyǵy qaýipsizdik talaptarynyń tolyq saqtalýyn qamtamasyz ete almaıdy, - dep jazylǵan Premer-mınıstrdiń jaýabynda.
Osyny alǵa tartqan Oljas Bektenov polıtsııanyń keıbir fýnktsısyn jeke kúzet qyzmetterine berý erte dep esepteıtinin aıtqan.
- Óz kezeginde ishki ister organdary dástúrli túrde qoǵamdyq tártipti qorǵap, buqaralyq is-sharalarda azamattardyń qaýipsizdigin qamtamasyz etedi. Polıtsııa qyzmetkerleri quqyq buzýshylyqtardyń aldyn alý men jolyn kesýde, adamdardyń ómiri men densaýlyǵyn qorǵaýda, qoǵamda turaqtylyq pen tynyshtyqty qamtamasyz etýde sheshýshi ról atqarady. Joǵaryda aıtylǵandardyń negizinde, qazirgi jaǵdaıda qoǵamdyq-saıası, memlekettik jáne kommertsııalyq buqaralyq is-sharalardy ótkizý kezinde qoǵamdyq qaýipsizdikti qamtamasyz etý fýnktsııalaryn jeke kúzet uıymdaryna berý máselesi áli erte dep sanaımyz, - delingen jaýapta.
Buǵan deıin memlekettik kúzet qyzmetiniń ókilettigi keńeıtilgenin jazǵan edik.