Úkimet Prezıdent Joldaýyn iske asyrý josparyn maquldady

ASTANA. KAZINFORM — Búgin Úkimet otyrysynda Memleket basshysynyń Joldaýyn iske asyrý jónindegi jalpyulttyq is-sharalar josparynyń jobasyn maquldady.

«Usynylǵan Jalpyulttyq is-sharalar jospary Memleket basshysy qoıǵan mindetterdi sapaly ári jedel sheshýge baǵyttalǵan. Úkimet pen ákimdikter ekonomıkanyń ornyqty ósýin qamtamasyz etý jáne azamattarymyzdyń áleýmettik jaǵdaıyn jaqsartý baǵytynda belsendi sharalar qabyldaıtyn bolady. Josparda kórsetilgen zań jobalaryn ýaqtyly ázirleý qajet. Oǵan sarapshylardy tarta otyryp, tereń taldaý jáne talqylaý júrgizý kerek», — dedi Premer-Mınıstr Oljas Bektenov. 

Sondaı-aq, Úkimet basshysy barlyq qarjylandyrý máselelerin de jete pysyqtaý qajettigin basa aıtty.

«Artyq shyǵyndardan bas tartyp, bıýdjet qarajatyn birinshi kezektegi jáne strategııalyq maqsattarǵa ǵana baǵyttaý kerek. Basty mindet — jospardyń is-sharalaryn tıimdi jáne ýaqtyly oryndaý. Orynbasarlaryma jospar boıynsha bekitilgen tarmaqtardyń iske asyrylýyna baqylaý jasap, úılestirýdi tapsyramyn», — dedi ol.

Osydan keıin Úkimet músheleri jalpyulttyq is-sharalar josparynyń jobasyn maquldady. 

«Ulttyq ekonomıka mınıstrligi Úkimet apparatymen birlesip, Memleket basshysynyń tıisti jarlyǵynyń jobasyn Prezıdent Ákimshiligine engizsin», — dedi Oljas Bektenov.