Úkimet Joldaýdy iske asyrý josparyn qabyldap, joldaǵy qaýipsizdik máselelerin pysyqtaıdy
ASTANA. KAZINFORM — Búgin saǵat 16:00–de Úkimet otyrysy ótip, onda Mınıstrler kabınetiniń músheleri 2 mańyzdy máseleni talqyǵa salady.
Atap aıtqanda, mınıstrler aldymen Memleket basshysynyń 2025 jylǵy 8 qyrkúıektegi Qazaqstan halqyna Joldaýyn júzege asyrý jónindegi Jalpyulttyq is-sharalar josparynyń jobasyn qaraıdy.
Odan keıin jol qozǵalysy men jaıaý júrginshilerdiń qaýipsizdigin qamtamasyz etý máselesin pysyqtaıdy. Otyrys qorytyndysy boıynsha ótetin baspasóz konferentsııasyna ishki ister mınıstriniń orynbasary Igor Lepeha BAQ ókilderiniń saýaldaryna jaýap beredi.
Esterińizge sala ketsek, 9 qyrkúıekte ótken Úkimet otyrysynda Memleket basshysy Qasym-Jomart Toqaevtyń «Jasandy ıntellekt dáýirindegi Qazaqstan: ózekti máseleler jáne ony túbegeıli tsıfrlyq ózgerister arqyly sheshý» atty Qazaqstan halqyna Joldaýynda aıtylǵan tapsyrmalardy iske asyrý joldary talqylanǵan edi.
Sol kezde Premer-mınıstrdiń orynbasary — Ulttyq ekonomıka mınıstri Serik Jumanǵarın Úkimet jahandyq básekege qabilettiligi joǵary eksporttyq óndirister qurý baǵytynda avtomobıl jasaý, temirjol mashınalaryn jasaý, hımııa ónerkásibi jáne munaı-hımııa, sırek kezdesetin metaldardy qosa alǵanda mıneraldyq-shıkizat bazasyn tolyqtyrý, sondaı-aq agroónerkásiptik keshen ónimderin qaıta óńdeý sııaqty perspektıvaly baǵyttardy aıqyndap otyrǵanyn aıtqan bolatyn.
Al Tsıfrlyq damý, ınnovatsııalar jáne aeroǵarysh ónerkásibi mınıstri Jaslan Mádıevtiń aıtýynsha, oqýshylar men stýdentter úshin TUMO, Tomorrow School, AI Sana jáne AI OLYMP baǵdarlamalary, sondaı-aq Day of AI bastamasy engizilip jatyr.
Memlekettik qyzmetshiler úshin AI Qyzmet baǵdarlamasy jumys isteıdi, kvazımemlekettik sektorda AI Corporate iske qosylady, al aýqymdy aýdıtorııa úshin Tech Orda jáne Qazqoders jáne Yandex kýrstaryn qosa alǵanda, onlaın-kýrstar men akseleratsııalyq baǵdarlamalar qoljetimdi.
Densaýlyq saqtaý mınıstri Aqmaral Álnazarova Memleket basshysynyń Joldaýyn iske asyrý maqsatynda dáriger mártebesi men áleýmettik jaǵdaıyn arttyrý baǵytynda mınıstrlik oblys ákimderine «Otbasy bankpen» birlesip, 2026 jyly ásirese kadr tapshylyǵy óte joǵary óńirlerde dárigerlerdi turǵyn úımen qamtamasyz etý usynylatyndyǵyn aıtty.
— Sonymen qatar, «Qazaqtelekommen» jáne jergilikti atqarýshy organdarymen birlesip, medıtsınalyq qyzmetkerlerdiń qaýipsizdigin qamatmasyz etý maqsatynda, 2100 jedel járdem brıgadalary jáne 644 statsıonardyń qabyldaý bólmeleri vıdeobaqylaýmen qamtamsyz etiledi. Osylaısha Memleket basshysynyń tapsyrmalaryn ýaqtyly jáne sapaly oryndaý úshin jan-jaqty sharalar qabyldanady, — dedi ol.
Eńbek jáne halyqty áleýmettik qorǵaý mınıstri Svetlana Jaqypova Eńbek resýrstaryn damytý ortalyǵynyń bazasynda kóshi-qon aǵyny máseleleri jónindegi taldaý ortalyǵy qurylyp jatqanyn aıtty.
Munan bólek Migration.Enbek.kz kóshi-qon protsesi týraly portal jumys istep tur. Portal sheteldik jumys kúshiniń qozǵalysyn, qandastardy tirkeý, esepke alýdy qosa alǵanda, el ishinde de, odan tys jerlerde de eńbek resýrsty qozǵalysyna baılanysty bıznes protsesti avtomattandyrýǵa múmkindik berdi.
Ǵylym jáne joǵary bilim mınıstri Saıasat Nurbek AI-Sana baǵdarlamasy júzege asyrylyp jatqanyn atap ótti.
Baǵdarlamanyń maqsaty — stýdentterdi jasandy ıntellektini ekonomıkanyń túrli salalarynda qoldanýǵa úıretý, startap ashýǵa jáne kásipkerlikke baýlý. Ol baǵdarlama tórt kezeńnen turady:
- Birinshi, barlyq stýdent Coursera, Huawei jáne Astana Hub platformalarynda jasandy ıntellekt negizderin meńgeredi.
- Ekinshi, arnaıy baǵdarlama arqyly stýdentter kásipkerlikti, jasandy ıntellektini túrli jobalarda qoldanýdy jáne jańa ıdeıa oılap tabýdy úırenedi.
- Úshinshi, stýdentter óz jobalaryn jasap, mentorlar men sarapshylardyń qoldaýymen damytady.
- Tórtinshi, úzdik jobalar startapqa aınalyp, halyqaralyq deńgeıge shyǵady.
Týrızm jáne sport mınıstri Erbol Myrzabosynov týrızm salasyn damytý úshin zańnamany jetildirý jumysy qolǵa alynǵanyn tilge tıek etti.
— Ákimdikterge eldi mekenderden tys aýmaqta, sonyń ishinde ulttyq parkterde týrıstik ınfraqurylym salý quqyǵy berildi. Fermerlerge aýyl sharýashylyǵy jerlerinde jeńil qurylystar men az qabatty qonaqúıler salyp, agrotýrızmmen aınalysý múmkindigi qarastyrylyp jatyr, — dedi mınıstr.
Aýyl sharýashylyǵy mınıstri Aıdarbek Saparov 2030 jylǵa qaraı elde iri qara mal sany 12 mln-ǵa, usaq mal basy 30 mln-ǵa jetkiziletigin atap ótti.
Onyń aıtýynsha, bankterden myna baǵyttarda qarjy tartylady:
- 5%-dyq jeńildetilgen kredıt berýdi taýarlyq sharýashylyqtarǵa, qus fabrıkalaryna jáne ózge de baǵyttarǵa keńeıtý;
- Aýyl sharýashylyǵy janýarlarynyń asyl tuqymdy mal basyn satyp alýǵa arnalǵan «uzaq merzimdi» jeńildetilgen qarjylandyrýdy engizý;
- «Damý» ınstıtýty arqyly qamtý deńgeıin 80%-ǵa deıin kepildik berý tetigin engizý.
Otyrysty qorytyndylaǵan Premer-mınıstr Oljas Bektenov barlyq vedomstvoǵa naqty tapyrmalar júktedi.
— Prezıdent atap ótkendeı, memlekettik basqarý júıesindegi tsıfrlyq tásil azamattar múddesine saı bolýyn qamtamasyz etip, ashyqtyǵy men tıimdiligin eselep arttyrady. Jappaı tsıfrlandyrý ártaraptandyrýmen qatar, ekonomıkany keshendi túrde jańǵyrtýǵa jáne Qazaqstandy jahandyq arenada básekege qabiletti el retinde damytýǵa yqpal etedi. Úkimet Joldaýda aıtylǵan mindetterdi jedel oryndaýǵa bar kúsh-jigerin jumyldyrady, — dedi Úkimet basshysy.