Úkimet Prezıdent Joldaýyn iske asyrý sharalaryn qarastyrady
ASTANA. KAZINFORM — Búgin Úkimet otyrysy ótedi. Onda Mınıstrler kabınetiniń músheleri Memleket basshysynyń «Qazaqstannyń jańa tarıhı kezeńdegi ózekti mindetteri» atty Joldaýyn júzege asyrý jónindegi sharalardy talqylaıdy.
Eske salaıyq, Vıtse-Prezıdent Erlan Qarın Quryltaıdaǵy partııa fraktsııalarynyń jetekshilerimen kezdesip, Prezıdent Joldaýyndaǵy strategııalyq bastamalardy zańnamalyq turǵydan qamtamasyz etý máselelerin talqylady.
Erlan Qarın Prezıdent sóılegen sózinde keler urpaqtyń múddesi úshin júzege asyrylatyn júıeli ózgeristerge basa nazar aýdarǵanyn atap ótti. «Halyqtyq qurylys» mindetteri halyqtyq tsıfrlyq ekonomıkany damytýmen tyǵyz sabaqtastyrylyp, Joldaýdyń ón boıynan kórinis tapty. Memleket kúsh-jigerin búkil azamattyq ınfraqurylymdy jańǵyrtýdyń irgeli máselelerine shoǵyrlandyryp otyr.
Vıtse-Prezıdenttiń aıtýynsha, memleket qordalanǵan júıeli problemalardy birtindep sheship, bolashaqtaǵy damýdyń berik negizin qalaýda.
— Prezıdent Joldaýda strategııalyq mańyzy bar jańa bastamalardy kóterdi. Olar Quryltaı tarapynan sapaly zańnamalyq qamtamasyz etýdi talap etedi. Osy baǵytta partııa fraktsııalarymen birlesip, tıimdi jumys isteýge daıynbyz, — dedi Erlan Qarın.
Partııa fraktsııalarynyń jetekshileri Joldaýda kóterilgen bastamalardy qoldap, ashyq ári syndarly yntymaqtastyqqa jáne birlesken jumysqa daıyn ekenin málimdedi.
Sonymen qatar, keshe Quryltaı otyrysynda Tóraǵa Aıbek Dádebaı Prezıdent Joldaýynyń mańyzy jóninde málimdeme jasaǵan edi.
Onyń sózinshe, Memleket basshysynyń Joldaýy — elimizdiń jańa jaǵdaıdaǵy aldaǵy naqty naqty damý baǵdaryn aıqyndaıtyn baǵdarlamalyq qujat.
— Bul — Konstıtýtsııa qabyldanyp, búkil saıası júıe jańǵyrtylǵannan keıingi alǵashqy joldaý. Endi Memleket basshysy jańa saıası ınstıtýttardyń aldyna naqty mindetter qoıyp otyr, ıaǵnı — júrgizip jatqan reformalardy naqty mazmunmen baıytyp, olardyń júzege asyrylýyn qamtamasyz etý. Osy oraıda, Quryltaı depýtattaryna da zor úmit artyp otyr, — dedi Aıbek Dádebaı.
Sonymen qatar, Prezıdentimizdiń basty nazarynda árdaıym adam, onyń ál aýqaty jáne óńirlerdi damytý máseleleri turǵanyn atap ótti. Quryltaı Tóraǵasynyń sózinshe, árbir qazaqstandyq joldaýdan ózi úshin mańyzdy sheshimderdi taba alady. Eń bastysy, joldaý elimiz ben azamattardyń ıgiligi jolynda barlyq memlekettik jáne qoǵamdyq qurylymdardyń júıeli ári qarqyndy jumys isteýine tyń serpin beredi. Prezıdent uzaq ýaqyt boıy tıisti sheshimin tappaı kelgen túıtkildi máselelerge taǵy da naqty jaýap berdi. Olar elimizdiń aldaǵy uzaq jylǵa arnalǵan tabysty ári ornyqty damýynyń berik negizin qalady.
Memleket basshysynyń Joldaýyna qatysty tek laýazymdy tulǵalar ǵana emes, ártúrli sala mamandary da ún qosyp, oı bólisip jatyr.
Máselen, Astana qalasyndaǵy № 101 mektep dırektorynyń orynbasary Qýanar Meıman Prezıdent Joldaýyndaǵy bilim berý salasyna qatysty bastamalarǵa pikir bildirdi.
Onyń aıtýynsha, muǵalimderdi artyq qujattamadan bosatý, mektepterdiń materıaldyq bazasyn nyǵaıtý jáne balalardy jaýapkershilikke tárbıeleý mańyzdy.
— Bilim berý salasyndaǵy qaǵazbastylyqty azaıtyp, muǵalimderdi artyq jumystan bosatý — ózekti máselelerdiń biri. Óıtkeni ustazdyń basty mindeti — qujat toltyrý emes, balaǵa sapaly bilim berip, sanaly ári jaýapkershiligi joǵary urpaq tárbıeleý. Sonymen qatar oqýshy men muǵalim arasyndaǵy ózara túsinistik pen syılastyqty nyǵaıtý mańyzdy. Bul qaǵıdalar «Adal azamat» birtutas tárbıe baǵdarlamasynyń qundylyqtarymen de úndesedi, — dedi ol.
Qýanar Meımannyń sózinshe, bilim berý salasyn damytý úshin muǵalimderdiń jaǵdaıyn jaqsartýmen qatar, mektepterdiń materıaldyq-tehnıkalyq bazasyn nyǵaıtý jáne zamanaýı bilim berý ortasyn qalyptastyrý qajet.
Osy oraıda aıta keteıik, sońǵy jeti jylda bilim salasyna bólinetin qarjy úsh ese artyp, 6,4 trıllıon teńgege jetti. Sońǵy bes jylda 1 mıllıonnan astam oqýshyǵa arnalǵan 1120 mektep salyndy. Sonymen qatar 5 myńnan astam aýyl mektebiniń materıaldyq-tehnıkalyq bazasy jańartylyp, bilim berý uıymdarynda 7 myńnan astam zamanaýı pán kabıneti jabdyqtalǵan.
Al Qýanar Meıman Prezıdenttiń kelesi jyldy Jalpyhalyqtyq aýqymdy qurylys jyly dep jarııalaýy bilim berý ınfraqurylymyn damytýǵa da serpin beretinin aıtady. Onyń pikirinshe, bul óskeleń urpaqtyń sapaly bilim alyp, jan-jaqty damýyna jaǵdaı jasaý baǵytyndaǵy jumystardyń jalǵasatynyn kórsetedi.
Eske salaıyq, buǵan deıin Prezıdent Joldaýyndaǵy ekonomıkalyq basymdyqtar elge qandaı múmkindik beretini jónindegi sarapshy pikirin jarııalaǵanbyz.
