Úkimet pen ulttyq kompanııalar jasandy ıntellekt tehnologııasyn engizýdi qolǵa alý kerek – Prezıdent

ASTANA. KAZINFORM – Prezıdent Qasym-Jomart Toqaev tsıfrlyq tehnologııany jan-jaqty engizý qajettigi jóninde tapsyrmalar berdi. 

− Qazaqstan tsıfrlandyrý isinde, ásirese, memlekettik qyzmet kórsetý salasyn tsıfrlandyrý jolynda edáýir jetistikke jetti. Biraq bul – aldaǵy úlken jumystyń basy ǵana. Tolyqqandy tsıfrlyq ekojúıe jasaý úshin onyń irgesi berik bolýǵa tıis, ıaǵnı, sapaly málimetter men ony qorǵaıtyn senimdi júıe qajet, - dep atap ótti Prezıdent Úkimettiń búgingi keńeıtilgen otyrysynda.

Prezıdent jasandy ıntellekt tehnologııasyn qarqyndy damytý keregin de aıtýda. Jyl sońyna deıin onyń keıbir tustaryn Elektrondy úkimet júıesine engizý qajet. Bul tehnologııany «Smart City» jobalarynda keńinen qoldaný máselesine aıryqsha nazar aýdarǵan jón.

Adam kapıtalyn damytýdy jáne joǵary oqý oryndaryn bilim berýden ǵylymı-zertteý tásilderine kóshirýdi kózdeıtin «AI-Sana» jasandy ıntellektini oqytý baǵdarlamasynyń mańyzy artyp keledi. Úkimet tsıfrlandyrý men jasandy ıntellektini qoldanýdyń birtutas júıesin qurýǵa tıis.

− Úkimetke memlekettik organdar men ulttyq kompanııalarǵa jasandy ıntellekt tehnologııasyn engizý jumysyn qolǵa alýdy tapsyramyn, - dedi Qasym-Jomart Toqaev.

Buǵan deıin Qasym-Jomart Toqaev Úkimettiń salyq-bıýdjet júıesin reformalaý týraly usynysyn maquldady, biraq halyqqa túsindirý jumystaryn júrgizý keregin basa aıtty.

Sonymen qatar Úkimet keleshegi zor árbir orta kásiporynnyń jumys josparyn ázirleıtini týraly aıtlyǵan edi.