Úkimet pen Ulttyq bank ınflıatsııany tómendetetin jospar ázirlep jatyr

ASTANA. KAZINFORM – Úkimet pen Ulttyq bank ınflıatsııany tómendetý úshin kezeń-kezeńmen iske asatyn jospar ázirlep jatyr. Bul týraly Ulttyq bank tóraǵasy Tımýr Súleımenov aıtty.

- 2026 jylǵa arnalǵan ınflıatsııa boljamy tómendep, 9,5-11,5 paıyz deńgeıinde kútiledi. Bul túzetý ınflıatsııanyń naqty dınamıkasy birshama baıaýlaǵanymen, teńge baǵamynyń qolaıly ózgerýimen, kommýnaldyq qyzmet tarıfteri men janar-jaǵarmaı baǵasyna qatysty boljamdardyń naqtylanýymen, sondaı-aq QQS-tyń ınflıatsııaǵa áseri burynǵydan tómen baǵalanýymen baılanysty. Boljamdar men baǵalaýlarda biz baǵdarlamalyq qujattarda, bıýdjet túzetýlerinde jáne Úkimet josparlarynda kórsetilgen parametrler tolyq oryndalady degen negizge súıenemiz,- dedi Tımýr Súleımenov.

Onyń atap ótýinshe, bul bıýdjet tapshylyǵy men munaıǵa jatpaıtyn tapshylyqtyń belgilengen deńgeıin saqtaý, bıýdjetke Ulttyq qor transfertterine táýeldilikti azaıtý, sondaı-aq kvazıfıskaldyq yntalandyrýdyń kelisilgen kólemderi men parametrlerine qatysty.

- Boljam dıapazonynyń tarylýy baǵanyń ósý qarqynyn bıyldyń ózinde bir tańbaly deńgeıge túsirý mindetimen de baılanysty. Osy maqsatta Úkimet pen Ulttyq bank ınflıatsııany tómendetý úshin kezeń-kezeńimen iske asatyn jospar ázirlep jatyr. Ol kommýnaldyq tarıfter men janar-jaǵarmaıdyń ınflıatsııaǵa qosatyn úlesin azaıtýdy, bıýdjettik konsolıdatsııany jáne kvazıfıskaldyq saıasattyń naqty parametrlerin bekitýdi kózdeıdi. Jalpy alǵanda ınflıatsııany bir tańbaly deńgeıge túsirýdi biz shynaıy maqsat dep baǵalaımyz. Buǵan tek baǵdarlamalyq qujattardyń oryndalýy ǵana emes, jyl basynan beri jıyntyq suranys dınamıkasynyń teńgerimdi bola bastaýy da negiz bolyp otyr., - dedi UB tóraǵasy.

Esterińizge sala ketsek, Ulttyq bankiniń Aqsha-kredıt saıasaty komıteti bazalyq mólsherlemeni +/- 1 p. t. dálizimen jyldyq 18% deńgeıinde belgileý týraly sheshim qabyldady.