Frantsııalyq Orano kompanııasymen energetıka salasyndaǵy jobalar talqylandy

QR Premer-Mınıstri Álıhan Smaıylov pen Orano S. A. kompanııasynyń bas operatsııalyq dırektory Nıkolıa Mas energetıka salasyndaǵy yntymaqtastyqtyń ózekti máselelerin talqylady, dep habarlaıdy Kazinform.

Kezdesý barysynda Úkimet basshysy Qazaqstan men Frantsııa energetıka salasynda baıyrǵy strategııalyq áriptes ekenin atap ótti.

«Orano – bizdiń osy baǵyttaǵy mańyzdy jáne senimdi seriktesimiz. Kompanııa Qazaqstanda 27 jyl boıy tabysty jumys istep keledi. Bul oraıda, «KATKO» birlesken kásiporny – uzaq merzimdi jáne ózara tıimdi seriktestiktiń dáleli. Biz yntymaqtastyqty odan ári damytý múmkindikterin qarastyrýǵa daıynbyz», - dedi Álıhan Smaıylov.

Óz kezeginde Nıkolas Mas Orano-nyń Qazaqstanmen ózara is-qımyldy keńeıtýge qyzyǵýshylyǵyn bildirdi.

«Qazirgi ýaqytta bizge eki taraptan da ózara is-qımyldy keńeıtýge yqpal ete alatyn iri jobalar jetispeıdi. Sol sebepti búgin men qarym-qatynasymyzdy naqty jobalar negizinde jańǵyrtýdy usynǵym keledi», - dedi ol.

Sonymen qatar kezdesýge QR Energetıka mınıstrligi, «Samuryq-Qazyna» AQ jáne «Qazatomónerkásip» ulttyq kompanııasynyń ókilderi qatysty.

Aıta keteıik, Orano S.A. – Frantsııanyń atom ónerkásibiniń iri kóshbasshy kompanııasy. Qyzmetiniń negizgi baǵyttary atom energetıkasymen, ıaǵnı ýran óndirý, óńdeý jáne baıytý, ıadrolyq otyndy tasymaldaý, radıoaktıvti qaldyqtarmen jumys isteý jáne t. b. baılanysty.