Úkimet pen bıznes kásipkerlikti damytýdyń jańa máselelerin talqylady

ASTANA. KAZINFORM – Serik Jumanǵarın «Amanat» partııasy janyndaǵy Kásipkerlikti damytý jónindegi úılestirý keńesiniń alǵashqy otyrysyna qatysty. Dıalog alańyna memlekettik organ, bıznes-qoǵamdastyq pen salalyq birlestik ókilderi kásipkerlikti damytýdyń negizgi máselelerin talqylaý úshin birikti. Bul týraly Úkimettiń baspasóz qyzmeti habarlady. 

Qazirgi ýaqytta memleket bıznesti qoldaýdyń 117 quralyn iske asyrýda. Onyń 76-sy qarjylyq, 38-i qarjylyq emes, 3-eýi múliktik qoldaý tetikteri. Sońǵy bes jylda tirkelgen shaǵyn jáne orta bıznes sýbektileri sany 40%-ǵa artyp, 2,3 mln birlikke jetken. Osy salada 4,5 mln adam jumyspen qamtylǵan.

«Atameken» ulttyq kásipkerler palatasynyń Óńdeý ónerkásibi komıtetiniń tóraǵasy Qanat Ibraev Qazaqstandyq taýar óndirýshiler tizilimin jasaqtaý tetigin jetildire túsý máselesin kóterdi. Júıe ázirge pılottyq rejımde jumys istep tur. Bıznes tarapynan oǵan qatysty ádisnamalyq jáne tehnıkalyq máseler áli de bar. Al Tizilim kelesi jylǵy 1 qańtardan bastap memlekettik satyp alý kezinde qoldanylǵal otyr.

Ónerkásip jáne qurylys mınıstrligi men Qarjy mınıstrliginiń ókilderi Tizilimniń tájirıbelik paıdalanýǵa engizilgenin habarlady. Qorda buǵan deıin «qazaqstandyq taýar óndirýshi» mártebesi baryn rastaǵan, qoldanystaǵy ındýstrııalyq sertıfıkattardyń ıeleri bolyp tabylatyn 1 868 kásiporyn tirkelgen. Olar endi memlekettik satyp alýlarǵa qatysý quqyǵyna ıe.

Tehnıkalyq jáne ádisnamalyq máselelerdi joıý boıynsha jumystardy júıeniń tehnıkalyq operatory — «Elektrondyq qarjy ortalyǵy» jalǵastyrýda.

Saýda jelileri odaǵynyń ókili Elbegı Ábdıev tutynýshylyq kredıtti qysqartý sharasy sheńberinde bólshek saýdanyń, ásirese azyq-túlikke jatpaıtyn taýar segmentinde ósý qarqynynyń baıaýlaǵanyna nazar aýdardy. Qazaqstan qarjygerleri qaýymdastyǵynyń baǵalaýynsha, saýdanyń JІÓ-degi úlesiniń joǵary bolýy jáne ondaǵy shaǵyn jáne mıkro bızneste jumyspen qamtylǵandar sanynyń mol ekendigi, sondaı-aq bólshek saýdadaǵy suranystyń azaıýy kásipkerlerdiń ónimderin ótkizýge tikeleı áser etýi múmkin.

Serik Jumanǵarın bul saýalǵa jaýap bere kelip, sońǵy jyldary tutynýshylyq nesıe berýdiń artýy korporatıvtik kredıtke keri áserin tıgizgenin atap ótti. Al 10 jyl buryn jaǵdaı kerisinshe edi. Bul rette saýda ózara baılanysty salalar men jumyspen qamtýdaǵy mańyzdy draıver bolyp qala beredi. Memlekettiń mindeti — tutynýdy tómendetpeı, JІÓ-niń ósýi esebinen tutynýshylyq nesıeleý úlesin qysqartyp, qalyptasqan jaǵdaıdan aqyryndap shyǵý. Bul mindettiń sheshimi ekinshi deńgeıdegi banktermen, Qazaqstan qarjygerleri qaýymdastyǵymen, Ulttyq bankpen jáne basqa da retteýshilermen birlesip ázirlenedi.

«Qazaqstan farmmedındýstrııa» farmatsevtıkalyq jáne medıtsınalyq ónim óndirýshiler qaýymdastyǵynyń prezıdenti Rýslan Sultanov shıkizat pen sýbstantsııalardan daıyn dári-dármek, medıtsınalyq buıym, qyzmetke deıingi tizbektiń barlyq kezeńinde densaýlyq saqtaý salasyna biryńǵaı 5% QQS mólsherlemesin engizýdi usyndy. Ol 2026 jyldan bastap medıtsınalyq ónimge salyq salý júıesi kóp deńgeıli jáne kúrdeli bolatynyn atap ótti:

• shıkizat pen jabdyq — 16% QQS;
• TMKKK jáne MÁMS aıasyndaǵy dári-dármek — 0%;
• dári-dármek pen medıtsınalyq buıymdar ımporty jáne ótkizý — 2026 jyldan bastap 5%, 2027 jyldan bastap 10%.

Saladaǵy mundaı úlgi otandyq preparattardyń ákimshilik shyǵyny men qunyn arttyrady. 5% QQS biryńǵaı mólsherlemesi ákimshilendirýdi jeńildetýge, teń básekelestik jaǵdaıyna jáne baǵanyń ósýin tejeýge múmkindik beredi. Serik Jumanǵarın jańa Salyq kodeksin engizýdiń alǵashqy nátıjesi belgili bolǵan soń, 2026 jylǵy ekinshi jartyjyldyqta bul máseleni qaıta qaraýdy usyndy.

Sondaı-aq, otyrysqa qatysýshylar áleýmettik mańyzy bar azyq-túlik taýary tizbesin keńeıtý, onyń shaǵyn jáne bólshek bıznes qyzmetine, sondaı-aq ımporttyq ónim baǵasyna áserin talqylady. Saýda jáne ıntegratsııa mınıstrligi Saýda komıteti bıznestiń birqatar usynysyn eskergeni atap ótildi. Olar — logıstıka men saqtaýǵa jumsalatyn shyǵystar shegerimge engizilip, ÁMAT-taǵy jańa pozıtsııalar tizbesi qysqartyldy. Mal sharýashylyǵyn damytý, munaı servıstik kompanııalarda jumyspen qamtý, óńdeý ónerkásibindegi tarıf belgileýde saralanǵan tásil engizý múmkindigi óz aldyna bólek qarastyryldy.

Otyrys qorytyndysynda Úılestirý keńesiniń jumysyn Úkimet tarapynan Ulttyq ekonomıka mınıstrligi qadaǵalaıtyny týraly sheshim qabyldandy. Barlyq aıtylǵan usynys, problemalyq másele túıindelip, múddeli memlekettik organdardyń, «Amanat» partııasy men «Atameken» UKP-nyń qatysýymen odan ári pysyqtaýǵa Úkimettiń baqylaýyna alynady. 

Aıta ketelik óndirýshilerge arnalǵan jańa tsıfrlyq platforma iske qosylǵany týraly jazǵan edik.