Úkimet pen Azııa damý banki $5,5 mlrd-qa 15 jańa jobany júzege asyrady
ASTANA. KAZINFORM – QR Premer-mınıstri Oljas Bektenov pen Azııa damý bankiniń (ADB) prezıdenti Masato Kanda Prezıdent Qasym-Jomart Toqaev belgilegen strategııalyq baǵyttar sheńberinde ınvestıtsııalyq yntymaqtastyqty damytý men ınfraqurylymdyq jáne áleýmettik mańyzy bar jobalardy qarjylandyrý máselelerin talqylady.
Kezdesý barysynda kólik jáne logıstıka, TJ, tsıfrlyq tehnologııalardy damytý, turǵyn úı naryǵy, «jasyl» qarjylandyrý jáne taǵy da basqa salalardaǵy jobalar talqylandy. Jasandy ıntellekt, data-ortalyqtar salý, talshyqty-optıkalyq magıstraldar júrgizý, kólik dálizderi men kedendik rásimderdi tsıfrlandyrý salasyndaǵy yntymaqtastyqty damytý áleýeti atap ótildi. Qaraǵandyda kadrlar daıarlaý jáne ǵylymı zertteýler júrgizý úshin 300 tósek orynǵa arnalǵan ýnıversıtettik aýrýhana salý boıynsha MJÁ jobasyn júzege asyrý barysy qaraldy.
Premer-mınıstr Memleket basshysy Qasym-Jomart Toqaev Qazaqstannyń ınfraqurylymdy jańǵyrtý jónindegi negizgi áriptesteriniń biri – Azııa damý bankimen jan-jaqty ózara is-qımylǵa erekshe mán beretinin atap ótti. Yntymaqtastyq sapaly ósimge jáne halyqtyń ál-aýqatyn arttyrýǵa basa nazar aýdara otyryp, ekonomıkalyq damýdy transformatsııalaýǵa baǵyttalǵan.
Azııa damý bankiniń prezıdenti Masato Kanda qarjy sektorynyń turaqtylyǵyn arttyrýdy qosa alǵanda, Qazaqstannyń qurylymdyq reformalar boıynsha júrgizip jatqan jumysyn joǵary baǵalady, sondaı-aq ekonomıka sektorlaryn aýqymdy tsıfrlandyrýdy qoldaýǵa múddeli ekenin bildirdi.
QR Úkimeti men Azııa damý banki arasynda 2026-2029 jyldar aralyǵynda jalpy somasy shamamen $5,5 mlrd bolatyn 15 perspektıvalyq jobany júzege asyrý boıynsha ózara túsinistik týraly memorandýmǵa qol qoıyldy. Qujat ekonomıkada jańa aýqymdy jobalardy júzege asyrý úshin múmkindik ashady. Atap aıtqanda, óńirlik ózara baılanys, tabıǵı apattarǵa tózimdilikti arttyrý, sý resýrstaryn basqarý, TKSh, QR turǵyn úı naryǵyn damytý jáne taǵy da basqa baǵyttar boıynsha bastamalar josparlanǵan. Sondaı-aq ADB jeke sektordy, onyń ishinde AÓK, kólik jáne logıstıka sııaqty basqa da salalardaǵy jobalardy qarjylandyrýdy jalǵastyrady.
Sonymen qatar «QazAvtoJol» UK» AQ pen Azııa damý banki arasynda Saryaǵash qalasyn aınalyp ótetin, uzyndyǵy 102 shaqyrym bolatyn aınalma jol salý jobasy boıynsha kelisimshartqa qol qoıyldy. Atalǵan jol B. Qonysbaev atyndaǵy ótkizý pýnkti arqyly Ózbekstanǵa shyǵýdy qamtamasyz etedi. Jańa jol tranzıttik aǵyndy eldi mekennen tys jerlerge shyǵarýǵa múmkindik beredi, bul turǵyndardyń qaýipsizdigin qamtamasyz etedi, avtomobıl qatynasyn jedeldetedi jáne Qazaqstan men Ózbekstan arasyndaǵy saýdanyń tıimdiligin arttyrady.
Aıta keteıik, Qarjy mınıstrligi bızneske júktemeni azaıtýdyń jańa tetikterin usyndy.