Úkimet otstavkaǵa ketedi, quramynda birqatar ózgeris bolady – Prezıdent
ASTANA. KAZINFORM – Memleket basshysy Qasym-Jomart Toqaev Quryltaı saılaýynan keıin Úkimettiń otstavkaǵa ketetinin jáne quramynda birqatar ózgeris bolatynyn aıtty. Prezıdent mundaı kadrlyq sheshimderdiń maqsaty – bireýdi qyzmetten bosatý emes, Úkimet jumysyna tyń serpin berý ekenin aıtty.
– Zańǵa sáıkes, Quryltaı saılaýynan soń Úkimet jumysyn toqtatýǵa tıis. Soǵan saı Mınıstrler kabıneti jasaqtalady. Jańa Úkimettiń baǵyt-baǵdary men mindetteri jóninde ne aıtasyz? – dep suraq qoıdy jýrnalıst Táýelsizdik saraıynda ótken brıfıngte.
Óz jaýabynda Prezıdent Úkimettiń barynsha tabandy, jedel jumys atqaryp, Memleket basshysy qoıǵan mindetterdi oryndap otyrǵanyn aıtty.
– Dúnıe júzindegi básekelestik kúsheıip keledi. Naryqtyń syn-qaterlerine muqııat nazar aýdaryp, eń bastysy, tıisti deńgeıde tótep berýimiz kerek. Álbette, Úkimet otstavkaǵa ketedi. Úkimet quramynda birqatar ózgeris bolady. Ashyǵyn aıtqanda, dál búgin Úkimet jumysyna alańdaýǵa nemese oǵan syn aıtýǵa qandaı da bir negiz joq. Mınıstrler de, Úkimet jetekshisi de qoldan kelgenshe mindetterin atqaryp jatyr. Biraq kadrlyq ózgerister árdaıym bolady. Óıtkeni bul Úkimettiń jumysyna qan júgirtedi, – dedi Memleket basshysy.
Onyń aıtýynsha, másele bireýdi ornynan bosatýda emes.
– Men jaı syltaýmen jumystan shyǵarýǵa qashanda qarsymyn. Ásirese, qazirgi tilmen aıtqanda, medıadaǵy kontent nemese mazmun úshin aýys-túıis jasaýdyń qajeti joq. Kadrlyq sheshim shyn máninde jumysqa tyń serpin berýi kerek. Bárimiz aıtyp júrgen jańǵyrý úderisi úzdiksiz júrgizilýge tıis. Óıtkeni bul kúrdeli protsesti alǵa jetelep otyrý qajet. Bul iste Úkimet mańyzdy ról atqarady, – dedi Qasym-Jomart Toqaev.
Aıta keteıik, búgin elimizdiń barlyq óńirinde Quryltaı depýtattaryn saılaý bastaldy. Daýys berý 10 423 saılaý ýchaskesinde ótedi.
Memleket basshysy Qasym-Jomart Toqaev Táýelsizdik saraıynda ornalasqan №520 saılaý ýchaskesinde daýys berdi.
Buǵan deıin Prezıdent «Vıtse-prezıdent kim bolady?» degen suraqqa jaýap bergen edi.
