Úkimet otyrysy: Premer-mınıstr mınıstrlikter men ákimdikterge qandaı tapsyrmalar berdi

Ár salaǵa jaýapty mamandar Qazaqstannyń qarqyndy damyp kele jatqanyn, jetken jetistikter kóp ekenin baıandady. Áıtse de, atqarylatyn jumystar áli de kóp syńaıly. Muny Úkimet basshysynyń bergen tapsyrmalarynan baıqaýǵa bolady.

QR Premer-mınıstri Oljas Bektenov Úkimet otyrysynda mınıstrlikterge, jergilikti atqarýshy organdarǵa jáne basqa da quzyrly mekemelerge naqty mindetter júktedi.

Máselen, Ónerkásip jáne qurylys mınıstrligine metallýrgııany damytýdy, arnaıy ekonomıkalyq aımaqtardyń tıimdiligin arttyrýdy jáne zamanaýı ınfraqurylym salýdy tapsyrdy.

— Jańa Konstıtýtsııanyń qabyldanýymen elimizdiń áleýmettik-ekonomıkalyq damýynda aýqymdy ózgerister júzege asyrylýda. Memleket basshysy qoıǵan mindetter aıasynda turaqty ekonomıkalyq ósýdiń jańa modeline kóshý úderisi júrip jatyr. Ekonomıkany belsendi ártaraptandyrý, zamanaýı ınvestıtsııalyq ekojúıeni qalyptastyrý, ınnovatsııalyq klasterler men ónimdiligi joǵary ındýstrııalardy damytý boıynsha aýqymdy jumystar bastaldy. Úkimettiń qadamy ekonomıka salalarynda qolda bar áleýetti barynsha tıimdi paıdalanýǵa baǵyttalyp otyr, — dedi ol.

Sonymen qatar, Úkimet basshysy ekonomıkanyń odan ári ornyqty damýyn qamtamasyz etý úshin qabyldanýy tıis naqty sharalardy atady.

— Birinshiden, Ónerkásip jáne qurylys mınıstrligi bir aı ishinde metallýrgııa salasyn yntalandyrýdyń qosymsha tetikterin ázirlesin. Tústi metallýrgııada mınıstrlik «Taý-Ken Samuryq» kompanııasymen birlesip, otandyq kásiporyndardyń óndiristik qýattaryn tolyq júkteýdi, onyń ishinde ımporttyq altyndy el ishinde affınajdaý úshin jetkizýdi qamtamasyz etsin. Qara metallýrgııada Qarmet kompanııasyn jańǵyrtý baǵdarlamasy aıasynda ishki jáne syrtqy naryqtarda barynsha suranysqa ıe ónim túrleriniń tizbesin keńeıtsin, — dedi ol.

Al óńdeýshi sektordyń ósý qarqyny ınvestıtsııalyq jobalardyń ýaqytyly iske asyrylýyna baılanysty.

— Óńir ákimdikterimen birge bir apta ishinde barlyq ınvestıtsııalyq jobalardy muqııat tekserip shyǵyp, problemalyq máselelerdi anyqtaýdy jáne olardy sheshýdiń naqty sharalaryn aıqyndaýdy tapsyramyn. Memleket basshysynyń tapsyrmasyna sáıkes arnaıy ekonomıkalyq aımaqtardyń tıimdiligin arttyrýdyń jańa tetikteri ázirlendi. Ónerkásip mınıstrligi bir aı ishinde jańa tetikterdi iske qosý úshin Úkimetke tıisti túzetýler jobasyn engizsin, — dedi Oljas Bektenov.

Odan bólek, qurylys jumystarynyń ósý qarqynyn saqtap, turǵyn úıdi paıdalanýǵa berý máselesin erekshe baqylaýda ustaý qajet.

— Árbir nysan boıynsha turaqty monıtorıng júrgizilip, týyndaıtyn máseleler jedel túrde sheshilýge tıis. Memleket basshysy áleýmettik jáne ınfraqurylymdyq nysandar salýǵa arnalǵan aýqymdy baǵdarlamany qolǵa alýdy tapsyrdy. Bul bastama jaqyn arada el azamattarynyń turmys sapasyn jaqsartýǵa múmkindik beredi. Zamanaýı densaýlyq saqtaý nysandaryn salýǵa erekshe basymdyq berý qajet, — dedi Oljas Bektenov.

Energetıka salasynda qandaı olqylyqtar bar

Úkimet otyrysynda energetıka salasy da nazardan tys qalǵan joq. Premer-mınıstr Energetıka mınıstrligine salany damytý boıynsha tapsyrma berdi.

— Munaı men gaz óndirýdiń josparlanǵan kórsetkishterine qol jetkizý maqsatynda Energetıka mınıstrligi barlyq jer qoınaýyn paıdalanýshylarmen kelissózder júrgizip, naqty is-qımyl josparyn ázirleýge tıis. Budan bólek, kómir hımııasynyń qolda bar áleýetin eskere otyryp, kómirdi qaıta óńdeý jobalaryna jeke ınvestıtsııalardy arttyrý jumysyn jandandyrýdy jáne áleýetti ınvestorlardy qoldaý sharalaryn keńeıtýdi tapsyramyn, — dedi ol.

Odan bólek, Oljas Bektenov Úkimet otyrysynda elimizdegi birqatar energetıkalyq nysannyń qurylys barysyna toqtaldy.

Úkimet basshysynyń sózinshe, ekonomıkanyń damýy elimizdi odan ári ındýstrııalandyrý men tsıfrlandyrý, sondaı-aq, ınfraqurylymǵa degen ósip kele jatqan suranysty qamtamasyz etý úshin energetıkalyq qýattardy arttyrýdy talap etedi.

Ol Energetıka mınıstrligi men «Samuryq-Qazyna» qorynyń basshylary Almaty elektr stantsııalary men Túrkistan oblysyndaǵy bý-gaz qondyrǵysynyń ýaqytyly iske qosylýyna tikeleı jaýap beretinin eske saldy.

Premer-mınıstrdiń málimdeýinshe, energetıka salasyndaǵy jobalarda olqylyqtar bar. Ásirese, Almatyda salynyp jatqan jańa jylý elektr ortalyqtaryndaǵy jumys qarqyny kóńil kónshitpeıdi.

— Samruq-Energonyń basshysy, Qaırat Maqsutov. Ótken aptada Energetıka mınıstri Almatyǵa baryp, ekinshi jáne úshinshi jylý elektr ortalyǵyn tekserip keldi. Úshinshi jylý elektr ortalyǵy boıynsha jaǵdaı máz emes. Jumys qarqyny óte tómen. Eger jyldyń sońyna deıin bitirmeseńizder, sizdiń jeke qatań jaýapkershiligińiz qaralatyn bolady. Kúndelikti baqylaýǵa alyńyz. Mundaı jaǵdaıdy doǵarý kerek, — dedi ol. 

Tranzıttik tasymal salasynda maqsat bıik

Elimiz Tranzıttik tasymal kólemin jylyna 55 mln tonnaǵa jetkizýdi josparlap otyr. Bul da — Premer-mınıstrdiń málimdemesi.

Onyń sózine júginsek, kólik sektorynda qyrýar sharýa atqarylýy tıis. Sol sebepti, Oljas Bektenov Kólik mınıstrligine salany damytý boıynsha birqatar tapsyrma berdi. Sonyń ishinde keı jobalar bıyl aıaqtalýy kerek.

— Kólik salasynda temirjol arqyly tranzıttik tasymal kólemin jylyna 55 mln tonnaǵa deıin ulǵaıtýǵa tikeleı yqpal etetin birqatar joba iske asyrylýda. Kólik mınıstrligi «Qazaqstan temir joly» kompanııasymen birlesip, osy jyldyń sońyna deıin negizgi temirjol jelileriniń qurylysyn, ıaǵnı Darbaza — Maqtaaral jáne Moıynty — Qyzyljar, sondaı-aq vokzaldardy jańǵyrtý jumystaryn aıaqtasyn, — dedi ol.

Sonymen birge, Úkimet basshysynyń sózinshe, avtomobıl joldaryn salý jáne kúrdeli jóndeý jumystary aıasynda olardyń normatıvtik talaptarǵa sáıkes kelýin qamtamasyz etý qajet jáne mýltımodaldy tranzıt kólemin arttyrý úshin kólik salasyn tsıfrlyq transformatsııalaý kerek.

— Kólik mınıstrligi Jasandy ıntellekt mınıstrligimen birlesip, zamanaýı tsıfrlyq quraldardy engizýdi, sodan keıin olardy Smart Data Transport biryńǵaı derekter kóline biriktirýdi qamtamasyz etsin. Bul salanyń ashyqtyǵyn arttyrýǵa jáne jasandy ıntellekt negizindegi sheshimderdi belsendi túrde engizýge múmkindik beredi, — dedi ol.

Aýyl sharýashylyǵy basty nazarda

Oljas Bektenov Aýyl sharýashylyǵy mınıstrligine de salany damytý boıynsha birqatar mindet júktedi.

Onyń sózinshe, aýyl sharýashylyǵynda vegetatsııalyq kezeńniń turaqtylyǵyn qamtamasyz etip, egin jınaý naýqanyn sapaly ótkizý jáne ınvestıtsııalyq jobalardy ýaqytyly iske asyrý — negizgi mindetter.

— Ótkizý naryqtaryn keńeıtý jáne otandyq ónimniń básekege qabilettiligin arttyrý maqsatynda Aýyl sharýashylyǵy mınıstrligine Básekelestikti qorǵaý jáne damytý agenttigimen birlesip, Azyq-túlik korporatsııasyna astyq óńdeý ónimderin tasymaldaý kezinde shyǵyndardy óteý jónindegi operatordyń ókilettikterin berýdi tapsyramyn, — dedi Premer-mınıstr.

Sonymen qatar, otandyq kásiporyndardy qoldaý maqsatynda Aýyl sharýashylyǵy mınıstrligi «Atameken» Ulttyq palatasymen birlesip, maqta óńdeý kásiporyndaryn jańǵyrtýǵa jáne qant qyzylshasyn tasymaldaýǵa ınvestıtsııalyq sýbsıdııalaý tetigin engizýi tıis.

Al óńirlerdiń ákimdikteri Aýyl sharýashylyǵy mınıstrligimen birlesip, naryqty et ónimderimen tolyqtyrý jáne onyń eksportyn ulǵaıtý úshin Mal sharýashylyǵyn damytý baǵdarlamasy aıasynda asyl tuqymdy mal basyn satyp alý jumysyn jedeldetýge mindetteldi.

Odan bólek, Úkimet basshysy jergilikti atqarýshy organdarǵa óndiris oryndaryn, ınvestıtsııalyq jobalardy jáne taýar aınalymyn ulǵaıtý boıynsha taǵy birqatar mindet júktedi.

— Elimizdegi jalpy taýar aınalymynyń 70%-dan astamy bes óńirge tıesili. Olar — Astana, Almaty, Shymkent, Atyraý jáne Qaraǵandy oblystary. Ár oblys saýdanyń ósýin qamtamasyz etý úshin óz áleýetin tıimdi paıdalanýy qajet. Bul baǵytta shekara mańyndaǵy óńirlerdiń, sondaı-aq týrıstik tartymdylyǵy joǵary aýmaqtardyń múmkindikteri mol. Arnaıy ekonomıkalyq jáne ındýstrııalyq aımaqtardyń áleýetin paıdalanyp, olardyń bazasynda zamanaýı saýda, qaıta óńdeý jáne kásipkerlik ortalyqtaryn damytý qajet. Óńir ákimdikterine aımaqtardyń ósip-órkendeýine jol ashatyn naqty óndiris oryndaryn, ınvestıtsııalyq jobalardy jáne taýar aınalymyn ulǵaıtý jónindegi nysanaly kórsetkishterdi aıqyndaı otyryp, bir aı merzimde Saýdany damytýdyń óńirlik jol kartalaryn ázirleýdi tapsyramyn, — dedi ol.

Sonymen birge, Úkimet basshysy Saýda jáne ıntegratsııa mınıstrligine atalǵan jumysty úılestirý men oryndalýyn baqylaýdy tapsyrdy.

Al shaǵyn jáne orta bıznes ekonomıkalyq ósimniń negizgi qozǵaýshy kúshi bolyp qala beredi.

— Biz osy salanyń odan ári damýy úshin qajetti jaǵdaılardyń bárin jasaýymyz kerek. Barlyq memlekettik organ «Atameken» Ulttyq palatasymen birlesip, óńirlerdegi kásipkerlermen olardyń bıznes-bastamalaryn jan-jaqty qoldaý maqsatynda ózara tyǵyz jumys isteýi qajet. Týyndaǵan barlyq problemalyq máseleler jedel túrde sheshimin tabýǵa tıis, — dep túıindedi Oljas Bektenov.

Aıta keteıik, buǵan deıin Premer-mınıstr gaz salasyn damytý boıynsha birqatar mindet júktegenin jazǵanbyz.