Úkimet otyrysy: Oljas Bektenov mınıstrlikterge qandaı tapsyrmalar berdi
ASTANA. KAZINFORM — Úkimet otyrysynda Premer-mınıstr jasandy ıntellekt negizindegi memlekettik qyzmetterdi damytý úshin mınıstrlikter men ózge de memlekettik organdarǵa birqatar mindet júktedi.
Eń aldymen, ol el ómiriniń ár salasyna, azamattarǵa jáne bızneske memlekettik qyzmetter kórsetý kezinde ozyq tehnologııalar men jasandy ıntellektini jappaı engizý jónindegi Prezıdent tapsyrmasyn eske saldy. Sonymen birge, jasandy ıntellekt quraldaryn sheshim qabyldaýda paıdalanyp qana qoımaı, olardyń kómegimen memlekettik qyzmetterdi kórsetýdiń tolyqqandy tsıfrlyq ekojúıesi qalyptasýǵa tıis ekenin atap ótti.
– Bul rette memleket pen azamattyń ózara is-qımyl modeli odan ári de sheshimderdi proaktıvti túrde qabyldaý qaǵıdatyna negizdelýi qajet. Búginde memlekettik qyzmetter kórsetý salasy tsıfrlandyrýdyń joǵary deńgeıine jetti. «Elektrondyq úkimet» portaly tolyǵymen jańǵyrtylyp, jańa eGov 3.0 platformasyna kóshirildi. Endi memlekettik organdar artyq qadamdar men qujattardy alyp tastap, óz qyzmetterin osy platforma arqyly kórsetýdi qamtamasyz etýge tıis. Qazirdiń ózinde eGov GPT tsıfrlyq assıstentiniń dıalog terezesi arqyly 50 qyzmet qoljetimdi. Ol qajetti ótinimdi ózi rásimdep, daıyn nátıjesin usynady, – dedi Oljas Bektenov.
Ol Jasandy ıntellekt mınıstrligine memlekettik organdarmen birlesip, osy jyldyń sońyna deıin tsıfrlyq assıstent arqyly kórsetiletin qyzmetter sanyn 150-ge deıin arttyrýdy tapsyrdy.
Sondaı-aq, tıimdiligi dáleldengen sheshimderdiń qoldanylý aıasyn keńeıtip, olardy turaqty ónerkásiptik paıdalaný rejımine kóshirý qajettigin málimdedi.
Úkimet basshysynyń sózinshe, bul baǵyttaǵy jarqyn mysaldardyń biri – «Tsıfrlyq jumyspen qamtý qyzmeti» jobasy. Ol azamattarǵa jumysqa tezirek ornalasýǵa, oqý kýrstaryn tańdaýǵa jáne onlaın rejımde qoldaý alýǵa múmkindik beredi.
– Eńbek mınıstrligi ákimdiktermen birlesip, atalǵan servısti osy jyldyń sońyna deıin elimizdiń barlyq óńirinde iske qossyn, – dedi ol.
Odan bólek, bızneske arnalǵan tsıfrlyq quraldarǵa erekshe nazar aýdarǵan jón. Premerdiń aıtýynsha, kásipkerlerdi qoldaýǵa baǵyttalǵan qyzmetterdiń 60%-y áli kúnge deıin qaǵaz túrinde kórsetilip keledi. Bul jaǵdaıdy ózgertý qajet.
– Ulttyq ekonomıka mınıstrligine «Atameken» palatasymen birlesip, osy jyldyń sońyna deıin kórsetiletin qyzmetterdi túbegeıli qaıta qarap, olardy dereý tsıfrlandyrýdy jáne eGov Business platformasyna shyǵarýdy tapsyramyn, – dedi ol.
Sonymen qatar, «Elektrondyq lıtsenzııalaý» portalynyń jumysyndaǵy túıtkilderge de toqtalyp, ruqsat berý jáne lıtsenzııalaý júıesin tolyq jańǵyrtý qajettigin málimdedi. Jasandy ıntellekt mınıstrligi memlekettik organdarmen birlesip, atalǵan jumysty 6 aı ishinde aıaqtaýǵa mindetteldi.
Oljas Bektenov Jasandy ıntellekt jáne tsıfrlyq damý mınıstrligi men basqa da memlekettik organdarǵa naqty bes baǵyt boıynsha tapsyrma berdi.
– Búginde kóptegen derekter bazasy áli de jetkilikti deńgeıde ıntegratsııalanbaǵan. Júıeler osy ýaqytqa deıin ártúrli tehnologııalyq sheshimder negizinde jumys istep keledi. Sondyqtan memlekettik organdar aqparattyq júıelerdi jańa biryńǵaı «QazTech» platformasyna kóshirý jáne ıntegratsııalaý úderisterin jandandyrýy qajet. Sonda ǵana azamattarǵa tsıfrlyq qyzmetter kórsetýdiń biryńǵaı ári tutas júıesin qamtamasyz etýge bolady. Jasandy ıntellekt mınıstrligi osy jumysty úılestirýdi kúsheıtsin, – dedi ol.
Sodan keıin halyqqa qyzmet kórsetý ortalyqtaryn AI-ofısterge transformatsııalaý boıynsha aýqymdy jumys júrgizilip jatqanyn atap ótti.
Úkimet basshysynyń málimdeýinshe, bul tek salalyq vedomstvonyń ǵana mindeti emes. Árbir óńir jańa tsıfrlyq ınfraqurylymdy qalyptastyrýǵa múddeli bolýǵa tıis. Sondyqtan ákimdikter Jasandy ıntellekt mınıstrligimen jáne «Azamattarǵa arnalǵan úkimet» korporatsııasymen birlesip, atalǵan jumysty osy jyldyń sońyna deıin aıaqtaýy qajet.
Odan bólek, Oljas Bektenovtyń sózinshe, búginde azamattar úshin tsıfrlyq qyzmetter sanyn kóbeıtip qana qoıý jetkiliksiz. Olar qajetti nátıjeni jyldam ári esh kedergisiz alǵysy keledi.
– Jasandy ıntellekt mınıstrligine múddeli memlekettik organdarmen birlesip, bıyl birden kórsetiletin formatqa kóshirýge bolatyn qyzmetterdiń tizbesin aıqyndaýdy tapsyramyn. Bul rette kópbalaly analarǵa járdemaqy taǵaıyndaý nemese sottylyǵynyń bar-joǵy týraly anyqtama berý sııaqty qyzmetterdi úlgi etip alýǵa bolady, – dedi ol.
Tórtinshiden, Úkimet basshysynyń málimdeýinshe, tabıǵı monopolııalar sýbektileriniń qyzmetteri – ınvestıtsııalyq jobalardy júzege asyrýǵa tikeleı yqpal etetin faktorlardyń biri. Alaıda bıznes óz nysandaryn kommýnaldyq ınfraqurylymǵa qosý úshin kóp ýaqyt joǵaltady. Mundaı qyzmetterdi kórsetýge qatysty ótinimderdi qaraý merzimderin sozbaı, jumystyń ashyqtyǵyn qamtamasyz etý qajet. Monopolııa sýbektileriniń belgilengen merzimderdi qatań saqtaı otyryp, qyzmetterdi tsıfrlyq formatta kórsetýin qamtamasyz etý Ulttyq ekonomıka mınıstrligine tapsyryldy. Bul jumystarǵa eki aı berildi.
– Taǵy bir máselege nazar aýdarǵym keledi. Bıyl naýryz aıynda azamattardyń kommýnaldyq qyzmettermen sharttardy proaktıvti túrde bekitýi boıynsha pılottyq joba aıaqtaldy. Bul is júzinde óte yńǵaıly servıs boldy, sharttar avtomatty túrde jasaldy. Alaıda tájirıbe jalǵasyn tappaı, toqtap qaldy. Jasandy ıntellekt mınıstrligi múddeli memlekettik organdarmen jáne ákimdiktermen birlesip, atalǵan qyzmetti barlyq óńirde tolyqqandy engizsin, – dedi ol.
Besinshiden, Premer-mınıstr Digital Qazaqstan strategııasy qabyldanǵanyn eske saldy. Biraq ony iske asyrý jónindegi is-qımyl josparyn kelisý jumysy sozylyp ketken.
– Jasandy ıntellekt mınıstrligine múddeli memlekettik organdarmen birlesip, osy jumysty dereý aıaqtap, bir apta ishinde Úkimetke tıisti qaýly jobasyn engizýdi tapsyramyn, – dep túıindedi Oljas Bektenov.
Sonymen qatar, atalǵan bes másele boıynsha baqylaý men úılestirý Jaslan Mádıevke júkteldi.
Aıta keteıik, buǵan deıin jasandy ıntellekt eńbek kitapshalaryn oqyp, zeınetaqy taǵaıyndaýǵa qatysatynyn jazǵanbyz.
Sonymen qatar, Qazaqstan Koreıadan jasandy ıntellekt pen «jasyl» energetıkaǵa ınvestıtsııa tartpaq.
Odan bólek, EAEO aıasynda jasandy ıntellekt pen kedergisiz saýdaǵa basymdyq beriledi.
