Úkimet otyrysy: Oljas Bektenov mınıstrlerge qandaı tapsyrmalar berdi
ASTANA. KAZINFORM — Úkimet otyrysynda Premer-mınıstr Oljas Bektenov sala basshylaryna jumysshy mamandyqtary boıynsha kadrlar daıarlaýdaǵy jańa tásilder jóninde birqatar mindet júktedi.
Aldymen ol ekonomıkanyń ornyqty damýy jáne áleýmettik turaqtylyq jumysshylardyń biliktiligi men eńbegine tikeleı baılanysty ekenin aıtty.
— Memleket basshysy ekonomıkanyń túrli salasyna zamanaýı tehnologııalardy qoldaný arqyly eńbek ónimdiligin arttyra alatyn jańa býyn mamandary qajet ekenin únemi atap ótýde. Jumysshy mamandyqtaryna aıryqsha nazar aýdarý qajet, — dedi Premer-mınıstr.
Onyń sózinshe, qazirgi tańda kez kelgen óndiristegi maman tsıfrlyq basqarý júıelerimen kásibı deńgeıde jumys istep, naqty mindetterdi sheshý úshin jańa tehnologııalar men jasandy ıntellekt quraldaryn qoldana bilýi tıis. Sol sebepti, qoldanystaǵy kadr daıarlaý júıesin dál osy maqsattarǵa saı qaıta qurý qajet.
— Tehnıkalyq jáne kásiptik bilim berý júıesi jańa mamandardyń eńbek naryǵyna jyldam ári básekege qabiletti bolyp enýin qamtamasyz etýi kerek. Sondyqtan memleket ekonomıka úshin kadrlar daıarlaýdyń negizgi býyny retinde kásiptik jáne tehnıkalyq bilim berý júıesin damytýǵa basymdyq berip otyr, — dedi Oljas Bektenov.
Memleket bul baǵytta naqty sharalar qabyldap jatyr. Sonyń arqasynda oń ózgeris baıqalady. Buryn kolledjderge bıýdjet esebinen jyl saıyn 93 myńǵa jýyq stýdent qabyldansa, bıyl olardyń sany 145 myń stýdentke deıin artty. Sonymen qatar, stıpendııa mólsheri 50%-ǵa kóterildi, al kolledjde bir stýdentti oqytýǵa jumsalatyn jalpy qarjylandyrý kólemi eki esege ósti.
Stýdentterdi jataqhanalarmen qamtamasyz etý baǵytynda da aýqymdy jumystar júrgizilip keledi.
— Buǵan deıin qolǵa alynǵan jańa jataqhanalar qurylysyn jalǵastyrý qajet. Aldaǵy úsh jyl ishinde tehnıkalyq jáne kásiptik bilim berý uıymdarynyń stýdentterine arnalǵan 7,5 myńǵa jýyq jańa oryn ashý kózdelip otyr. Bul jospar oryndalýy tıis, — dep naqty tapsyrma berdi Premer-mınıstr.
Sonymen qatar, taǵy birqatar qosymsha shara qabyldaý qajettigin málimdedi. Máselen, qarjylandyrý kólemi kolledjderdiń múmkindikterine emes, ekonomıkanyń kadrlarǵa degen naqty qajettilikterine saı aıqyndalýy kerek.
Túlekterdiń jumysqa ornalasý kórsetkishterine monıtorıng júrgizý de Úkimet basshysynyń nazarynan tys qalǵan joq. Onyń aıtýynsha, eńbek naryǵyndaǵy ózgeristerdi aldyn ala eskerip, olardy tıimdi basqarý úshin jetekshi kompanııalarmen birge memleket pen jeke seriktestik negizinde Ulttyq mamandyqtar transformatsııasy ortalyǵyn qurý tapsyryldy.
Degenmen, bul máselede vedomstvolar arasynda ózara kelispeýshilik baıqalady.
— Ǵylym jáne Eńbek mınıstrlikteri osy jyldyń sońyna deıin jańa mamandyqtar men suranysqa ıe quzyretterdi boljaý úderisine jumys berýshilerdiń qatysýyn kózdeıtin naqty tetikterdi aıqyndap, Ortalyqtyń tolyqqandy jumysyn qamtamasyz etsin, — dedi Oljas Bektenov.
Budan bólek, onyń sózinshe, kolledjderdiń tartymdylyǵyn arttyrý boıynsha tıimdi is-sharalar qabyldaý da mańyzdy. Ol úshin:
· oqý baǵdarlamalaryn eńbek naryǵy men halyqtyń suranysyna sáıkes únemi jańǵyrtyp otyrý kerek;
· qajetti mıkro-biliktilikterdi alý maqsatynda qysqa merzimdi modýldik baǵdarlamalar ashqan jón.
Bul amaldardyń arqasynda kolledj kásibı bilim men daǵdylardy meńgerý úshin sanaly túrde tańdaıtyn bilim oshaǵy bolýy kerek.
Sonymen qatar ınfraqurylymdy aıtarlyqtaı jańǵyrtý qajet. Óıtkeni, respýblıkadaǵy tehnıkalyq jáne kásiptik bilim berý uıymdarynyń 70%-dan astamy 40 jyl buryn salynǵan.
— Prezıdent iri ınfraqurylymdyq jáne áleýmettik nysandardyń qurylysyn bastaýdy tapsyrdy, ıaǵnı, elimiz alyp qurylys alańyna aınalýy tıis. Atalǵan mindet aıasynda Memleket basshysy kolledjderdi salý men olardy keshendi túrde jańǵyrtý tásilderin de maquldady. Osyǵan baılanysty Oqý-aǵartý mınıstrligine múddeli memlekettik organdarmen jáne óńir ákimdikterimen birlesip, osy jyldyń 1 qarashasyna deıin Úkimetke 2027–2030-shy jyldarǵa arnalǵan Tehnıkalyq jáne kásiptik bilim berýdiń zamanaýı ınfraqurylymyn damytý baǵdarlamasyn engizýdi tapsyramyn, — dedi Premer-mınıstr.
Onyń málimdeýinshe, kadr tapshylyǵyn eńserý jáne bilim berý júıesi men bıznestiń naqty suranystaryn ushtastyrý óte ózekti. Sol sebepti, jumys berýshiler men salalyq qaýymdastyqtardyń qajettilikterin bilim berý uıymdarynyń múmkindikterimen úılestirý qajet.
Úkimet basshysy Oqý-aǵartý mınıstrligine Eńbek mınıstrligimen, «Atameken» ulttyq palatasymen jáne óńir ákimdikterimen birlesip jumys isteýdi tapsyrdy. Olar árbir óńirde ekonomıkanyń basym salalary boıynsha kadrlar daıarlaý jáne olardy táýelsiz sertıfıkattaý jónindegi salalyq klasterler qurýy kerek.
Sonymen qatar, kolledjderde stýdentterdi oqytý úshin memlekettik tapsyrysty daıyndaǵanda, qajetti jumys oryndarynyń naqty sany aıqyndalýy tıis. Bul óńirlerdiń jáne jańa joǵary tehnologııalyq óndiris oryndarynyń naqty qajettilikterine saı kadrlardy barynsha tıimdi daıarlaýǵa áser etedi.
— Ol úshin Eńbek, Oqý-aǵartý jáne Ǵylym mınıstrlikteri men óńir ákimdikteri óndiristerdegi jumys oryndarynyń túrleri men sanyn jyl saıyn boljaý boıynsha júıeli taldaý jumystaryn jolǵa qoıýy qajet. Derekter turaqty túrde jańartylyp, Eńbek.kz aqparattyq júıesinde ornalastyrylýǵa tıis. Jalpy úılestirý Nurlybek Mashbekuly Nálibaevta, — dep túıindedi Úkimet basshysy.
Aıta keteıik, buǵan deıin 138 myń stýdent óndiriste tájirıbe jınaıtynyn jáne 11,7 myń kásiporyn kolledjdermen jumys isteıtinin jazǵanbyz.
