Úkimet otandyq taýar óndirýshiler men shaǵyn bıznesti qoldaýdy keńeıte túspek

ASTANA. KAZINFORM — 2024 jylǵy Memleket basshysy Qasym-Jomart Toqaevtyń Joldaýyn júzege asyrý aıasynda Úkimet shaǵyn jáne orta bıznesti qarjylyq ári qarjylyq emes qoldaý tetikterin keńeıtýge, satyp alýlardaǵy qazaqstandyq úlesti ulǵaıtýǵa jáne kapıtal tartýǵa qolaıly jaǵdaı jasaýǵa erekshe nazar aýdaryp otyr. Bul týraly Úkimettiń baspasóz qyzmeti málimdedi.

— Otandyq kásiporyndardyń júktemesin arttyrý maqsatynda uzaqmerzimdi kelisimsharttar men ofteık-kelisimsharttar engizildi. Memlekettik satyp alýlar aıasynda ulttyq rejımnen 4 834 taýar pozıtsııasy alynyp tastaldy. 2025 jyldyń alǵashqy alty aıynyń qorytyndysy boıynsha jalpy somasy 333,4 mlrd teńgege 106 myńnan astam kelisimshart jasaldy, bul 2024 jyldyń tıisti kezeńimen salystyrǵanda eki eseden asa joǵary kórsetkish, — delingen habarlamada.

Búgingi tańda qazaqstandyq taýarlar tizilimin qalyptastyrý jumysy aıaqtalýǵa jaqyn. Bul platforma ST-KZ jáne ındýstrııalyq sertıfıkattardy almastyryp, memlekettik derekqorlar arqyly málimetterdiń avtomatty túrde verıfıkatsııalanýyn qamtamasyz etedi, sybaılas jemqorlyq táýekelderin azaıtady jáne naqty óndiristi rastaýǵa múmkindik beredi.

Kompanııalar QR-kody bar tegin onlaın-anyqtama ala alady; Tizilimge engizý tek rastalǵan óndiris bolǵan jaǵdaıda ǵana júzege asyrylady. Platformany tolyqqandy iske qosý 2026 jylǵy 1 qańtarǵa josparlanǵan. 

Buǵan deıin habarlanǵandaı, elimizde salyqtyq ákimshilendirýdiń ıntegratsııalanǵan júıesi engizilmek.