Úkimet otandyq óndiristi damytý máselesin talqylaıdy
ASTANA. KAZINFORM – Búgin saǵat 10:00-de Úkimettiń kezekti otyrysy ótedi. Kún tártibine otandyq óndiristi damytý men qoldaý sharalary shyǵarylyp otyr.
Negizgi baıandamany Ónerkásip jáne qurylys mınıstri Ersaıyn Naǵaspaev jasaıdy. Ol bıyl 4 aıdaǵy óńdeý ónerkásibi kórsetken nátıjelerge toqtalady. Sondaı-aq Memleket basshysynyń tapsyrmasymen otandyq taýar óndirýshilerdi qoldaý úshin mınıstrlik tarapynan atqarylyp jatqan jumystardy atap ótedi.
Óńdeý ónerkásibin qoldaýdaǵy tıimdi quraldardyń biri – retteletin satyp alýlar jaıynda sóz qozǵap, 5 aıdaǵy kórsetkishterge basymdyq beredi. Munan bólek, óńirlerge ınvestıtsııa tartý jáne shaǵyn-orta bıznesti qoldaýǵa baǵyttalǵan shaǵyn ónerkásiptik aımaqtar baǵdarlamasyna da nazar aýdartady.
Aıta keteıik, bıyl shamamen 1,5 trıllıon teńgeniń 190 ındýstrııalyq jobasyn iske qosý kózdelip otyr. Bul 22,5 myń jańa jumys ornyn ashýǵa jáne otandyq ekonomıkadaǵy óńdeý ónerkásibiniń pozıtsııasyn nyǵaıtýǵa múmkindik beredi. Basymdyq beriletin salalar — metallýrgııa, mashına jasaý, hımııa ónerkásibi jáne basqa da joǵary qosylǵan quny bar ónim shyǵaratyn salalar.
Ónerkásip salasyndaǵy bıznesti yntalandyrý úshin memleket 800 mıllıard teńge bólýdi qarastyrdy, onyń ishine ónerkásip alańdaryn qurý jobalaryna jeńildetilgen qarjy bólý de kiredi.
Otyrys qorytyndysy boıynsha ótetin baspasóz konferentsııasyna Ónerkásip jáne qurylys vıtse-mınıstri Oljas Saparbekov, Qarjy vıtse-mınıstri Dáýren Keńbeıil, «QazIndustry» qazaqstandyq ındýstrııa jáne eksport ortalyǵy» AQ basqarma tóraǵasynyń orynbasary Aıdar Qojahmetov qatysady.
Úkimet otyrysynyń tikeleı taratylymy PrimeMinister.kz saıtynda, YouTube resmı arnasynda, Facebook áleýmettik jelisinde, sondaı-aq UKIMET Telegram-kanalynda júredi.
Baspasóz konferentsııasynyń tikeleı taratylymy YouTube resmı arnasynda jáne Facebook áleýmettik jelisinde kórsetiledi.
Aıta keteıik, 27 mamyrda ótken Úkimet otyrysynda ótken jylytý maýsymynyń qorytyndysy jáne aldaǵy jylý berý maýsymyna daıyndyq máselesi pysyqtalǵan edi. Kún tártibine shyǵarylǵan másele boıynsha Ónerkásip jáne qurylys mınıstri Ersaıyn Naǵaspaev baıandama jasady.
Onyń aıtýynsha, ótken jyldyń qorytyndysy boıynsha, shamamen 110 mıllıon tonna kómir óndirildi. Onyń ishinde halyq pen kommýnaldyq-turmystyq sektor 8,6 mıllıon tonna, energııa jáne jylý óndirýshi kásiporyndar 66 mıllıon tonna, ónerkásip sektory 6 mıllıon tonnamen qamtamasyz etildi. Eksportqa 30 mıllıon tonna kómir shyǵaryldy. Ótken jyly jylytý maýsymynda kommýnaldyq-turmystyq sektor 7,9 mln tonna kómir tutynady dep josparlandy jáne barlyq tutynýshy tolyq kólemde kómirmen qamtylyp, jospar 101 paıyzǵa oryndalǵan.
− Respýblıkalyq shtabtyń «Qazaqstan temir joly», jergilikti atqarýshy organdarmen jáne kómir óndirýshilermen birlesken jumysy arqyly kómir turaqty jetkizildi. Qoımalar men temirjol tuıyqtarynda shamamen 350 myń tonna kómir qory bar. 2025-2026 jyldarǵa arnalǵan jylytý maýsymyna kómirdi úzdiksiz jetkizý jospary ázirlenip, jergilikti atqarýshy organdarǵa, QTJ jáne kómir kompanııalaryna joldandy, − dedi mınıstr.
Sonymen qatar otyrysta Energetıka vıtse-mınıstri Suńǵat Esimhanov elimizde bıyl iske qosylatyn energetıka salasyndaǵy birqatar qýat kózine toqtaldy.
— Bıyl biz 620 MVt energııa kólemin iske qosamyz: onyń 166 MVt dástúrli energetıka, «Tulpar» elektrostansasynda 130 MVt, Tekeli Jylý ortalyǵynda 36 MVt. Oǵan qosymsha jańartylatyn energııa kózderiniń 9 obektisin (455 MVt) bıyl iske qosamyz. Barlyq joba baqylaýda, - dedi ol.
Otyrysty qorytyndylaǵan Úkimet basshysy Oljas Bektenov oblys basshylary men mınıstrlerge mynandaı 5 naqty tapsyrma berdi:
- Óńir ákimdikteri barlyq konkýrstyq rásimdi eki apta merzimde aıaqtap, jóndeý jumystaryna naqty kirisýi kerek. Basy artyq bıýrokratııaǵa jol berýge bolmaıdy. Bıyl iske qosý josparlanyp otyrǵan jańa jylý nysandary boıynsha barlyq jumystardy tamyz aıynan keshiktirmeı aıaqtaý qajet. Ákimder jylý nysandaryna apta saıyn baryp, jaǵdaıdy jeke baqylaýǵa alýy jáne barlyq týyndaǵan táýekel boıynsha shuǵyl áreket etýi tıis.
- Energetıka jáne Ónerkásip mınıstrlikteri, óńir ákimdikteri 10 maýsymǵa deıin jylytý maýsymyna daıyndyq josparlaryn naqtylaýy qajet. Soltústik, ortalyq jáne shyǵys óńirlerde barlyq ınjenerlik ınfraqurylym men turǵyn úı-kommýnaldyq sharýashylyq obektileri 15 qyrkúıekke deıin, al qalǵan óńirlerde 15 qazanǵa deıin tolyqtaı ázir bolý kerek.
- «KEGOC» kompanııasy Energetıka mınıstrligimen birlesip, 15 maýsymǵa deıin aldaǵy jylytý maýsymynda ulttyq mańyzy bar stantsııalarǵa arnalǵan jabdyqtardyń jumys rejımderin bekitýi qajet. Jóndeý merzimderin aýystyrýǵa nemese jumys kólemin azaıtýǵa jol berilmeıdi. Árbir fakt boıynsha menshik ıelerine, sol sııaqty basqarýshy kompanııalarǵa qatysty sharalar qabyldanady.
- Energetıka mınıstrligi Kólik mınıstrligimen jáne ákimdiktermen birlesip, 1 qyrkúıekke deıin jylý kózderi men tuıyqtarda otyn qoryn aldyn ala jınaqtaýdy qamtamasyz etýi tıis.
- Úkimet Apparaty óńirlerdiń jylytý maýsymyna ázirlik barysyna turaqty negizde baqylaý jasap, Premer-Mınıstrge tıisti aqparat berip otyrýy kerek.