Úkimet otandyq Aitu messendjerine tıisti deńgeıde kóńil bólmeı otyr – Prezıdent

ASTANA. KAZINFORM — Úkimet úı sharýashylyqtarynyń áleýmettik tsıfrlyq profılin qalyptastyrýǵa tıis. Bul týraly Úkimettiń keńeıtilgen otyrysynda Memleket basshysy Qasym-Jomart Toqaev aıtty.

- Áleýmettik salany tsıfrlandyrý máselesi de óte mańyzdy. Byltyr respýblıkalyq bıýdjettiń 40 paıyzǵa jýyǵy osy salaǵa bólindi. Biraq bul qarajat qanshalyqty tıimdi jumsaldy degen oryndy suraq týyndaıdy. Sondyqtan Úkimet úı sharýashylyqtarynyń áleýmettik tsıfrlyq profılin qalyptastyrýǵa tıis. Sonda áleýmettik kómek te shyn máninde kómekke muqtaj adamdarǵa beriledi, - dedi Memleket basshysy.

Prezıdenttiń aıtýynsha, qarjylaı tólemaqydan bastap, azyq-túlik, dári-dármek, baspana nemese bilim alýǵa beriletin vaýcherlerge deıingi qoldaýdyń barlyq túri bank jáne tólem ınfraqurylymymen tyǵyz baılanysqan «Áleýmettik ámııan» arqyly berilýge tıis.

- Úkimet ákimdiktermen birge osy tájirıbeni barlyq jerde keńinen qoldanýy kerek. Sondaı-aq bul tásildi jyl sońyna deıin tezdetip iske qosýy qajet. Meniń baıqaýymsha, Úkimet otandyq Aitu messendjerine tıisti deńgeıde kóńil bólmeı otyr. Tipti ony memlekettik qyzmetkerler de paıdalanbaıdy. EGov AI dep atalatyn ámbebap jasandy ıntellekt-kómekshisin (assıstentin) ázirleý kerek. Barlyq azamatqa qoljetimdi bolatyn osy júıe birtindep Halyqqa qyzmet kórsetý ortalyqtarynyń ornyn basady. Áleýmettik qoldaý sharalaryn basqaratyn ınfraqurylymdy, ıaǵnı Biryńǵaı tsıfrlyq áleýmettik qorǵaý platformasyn naqty aıqyndap alý qajet, - dedi Qasym-Jomart Toqaev.

Buǵan deıin Prezıdent salyq júıesin jappaı tsıfrlandyrýǵa shuǵyl kirisken jón ekenin aıtqan edi.