Úkimet órt qaýipsizdigi boıynsha daıyndyqty kúsheıtýdi tapsyrdy
ASTANA. KAZINFORM – Bul týraly Oljas Bektenov kóktemgi egis jumystaryn aıaqtaý jáne AÓK-ti damytý máseleleri jónindegi keńeste aıtty.
Osy jyldyń aqpan aıynda Úkimettiń keńeıtilgen otyrysynda berilgen Memleket basshysynyń veterınarııalyq ınfraqurylym deńgeıin odan ári arttyrý jónindegi tapsyrmalaryn oryndaýǵa erekshe nazar aýdaryldy. Aýyl sharýashylyǵy mınıstrligine ákimdiktermen birlesip veterınarııalyq is-sharalardy ýaqtyly jáne tıimdi júrgizýdi qamtamasyz etý, aýyl sharýashylyǵy óndirýshileri arasynda túsindirý jumystaryn kúsheıtý tapsyryldy.
— Mınıstr atap ótkendeı, Qazaqstan aýsyldan taza el mártebesine ıe boldy. Biz aldaǵy ýaqytta da osyndaı mártebege saı bolýymyz kerek. Sonymen qatar mal sharýashylyǵynyń turaqty damýy veterınarııalyq qaýipsizdik deńgeıine tikeleı baılanysty. Aýrýlardyń aldyn alý men baqylaýdyń tıimdi júıesi bolmasa, mal basynyń ósýin, ónimdilikti arttyrý jáne ónim sapasyn jaqsartý múmkin emes. Osyǵan baılanysty ishki naryqtaǵy epızootııalyq turaqtylyqty qamtamasyz etý óte mańyzdy, — dep atap ótti Premer-mınıstr.
Ákimdikterge bazarlarda veterınarııalyq jáne fıtosanıtarııalyq baqylaýdy kúsheıtýdi, onyń ishinde veterınarııalyq-sanıtarııalyq talaptardyń qadaǵalanýyn jáne saqtalýyn qamtamasyz etý tapsyryldy. Óńirlerde veterınarııalyq ınfraqurylymdy salý jáne jańǵyrtý boıynsha mindetter qoıyldy.
— Aýyl sharýashylyǵy salasyndaǵy memlekettik saıasat tıimdilik pen agrarshylardyń adaldyq qaǵıdattaryna negizdelip qalyptastyrylady. Sonymen qatar ákimdikter bólingen qarajattyń maqsatty paıdalanylýyn turaqty baqylaýda ustaýy qajet.
Memleket basshysy jarııalaǵan Tsıfrlandyrý jáne jasandy ıntellekt jylynda agrarlyq óndiristiń barlyq kezeńine — egistikten bastap saýda sóresine deıin tsıfrlyq quraldardy engizý talap etiledi.
Sondaı-aq aýyl-aımaqta jaıly ómir súrýge jaǵdaılar jasaý mańyzdy. Zenchenko, Eralıev, Saýer, Qurmanqulov sharýashylyqtarynyń aýyldary sekildi mysaldar elimizde az emes, alaıda olardyń sany arta túsýi tıis. Memleket olardyń damýyn jan-jaqty qoldap, yntalandyratyn bolady, — dep atap ótti Premer-mınıstr.
Sonymen qatar aǵymdaǵy birqatar ózekti máseleni sheshý boıynsha tapsyrmalar berildi:
aýyl sharýashylyǵynyń qosymsha baǵyttaryn damytý maqsatynda Aýyl sharýashylyǵy mınıstrligi men «Báıterek» UBH jylyjaılar, baý-baqsha jáne balyq sharýashylyqtaryn jeńildetilgen nesıeleý baǵdarlamalaryn iske qosý jóninde (jeke ınvestıtsııalar men MJÁ tetikterin eskere otyryp) qysqa merzimde usynystar engizý;
jeńildetilgen qarjylandyrý alý kezinde mal ósirýshilerdiń qajetti kepiliniń bolmaýy máselesin sheshý úshin Aýyl sharýashylyǵy mınıstrligine, Qarjy mınıstrligine jáne «Báıterek» UBH qaryzdarǵa kepildik berý tetigin jedel túrde engizý tapsyryldy;
Ónerkásip jáne qurylys mınıstrligine qazaqstandyq agrarshylardy otandyq mıneraldy tyńaıtqyshtarmen tolyq kólemde jáne turaqty baǵamen qamtamasyz etý boıynsha sharalar qabyldaý;
shegirtkelerdiń taralýyna jol bermeý úshin Aýyl sharýashylyǵy mınıstrligine óńir ákimderimen birlesip 2,2 mln gektar alqapta hımııalyq óńdeý jumystaryn ýaqytyly ári sapaly aıaqtaý, zııankester oshaqtaryn oqshaýlaý;
Sý resýrstary jáne ırrıgatsııa, Aýyl sharýashylyǵy, Mádenıet jáne aqparat mınıstrlikterine sý resýrstaryn utymdy paıdalaný jáne sý únemdeý tehnologııalaryn qoldaný boıynsha aqparattyq-túsindirý jumystaryn kúsheıtý.
— Dala men orman órtiniń qaýpi kúsheıip otyr. Tótenshe jaǵdaılar mınıstrligi Ekologııa mınıstrligimen jáne óńir ákimdikterimen birlesip azamattyq qorǵaý qyzmetteri men kúshteriniń joǵary ázirligin qamtamasyz etýi qajet. Órt sóndirý tehnıkasynyń, baılanys júıeleriniń jáne janar-jaǵarmaı qorynyń daıyndyq deńgeıin tekserý kerek. Sondaı-aq aldyn alý sharalary aıasynda orman jáne dala alqaptaryn, ásirese eldi mekender men egistik jerlerge jaqyn aýmaqtardy qýraǵan shópter men ósimdik qaldyqtarynan tazartý jumystaryn júrgizý qajet, — dep tapsyrdy Oljas Bektenov.
Atalǵan barlyq tapsyrmalardyń sapaly oryndalýyn baqylaý Aýyl sharýashylyǵy mınıstrligine jáne oblys ákimdikterine júkteldi.
Eske salsaq Bektenov jumys oryndaryn ashpaǵan jer ıelerinen jer qaıtarylatynyn eskertken edi.
