Úkimet Oraldyń jylý magıstralin rekonstrýktsııalaýǵa 2,5 mlrd teńge bóldi

ASTANA. KAZINFORM – Memleket basshysy Qasym-Jomart Toqaevtyń azamattardy úzdiksiz jylýmen qamtamasyz etý jónindegi tapsyrmalaryn júzege asyrý aıasynda elimizde ınfraqurylym júıeli túrde jańǵyrtylyp jatyr. Batys Qazaqstan oblysy Oral qalasynyń 3,9 shaqyrym magıstraldy jylý jelilerin rekonstrýktsııalaý jumystaryn aıaqtaý úshin Úkimet rezervinen shamamen 2,5 mlrd teńge bólindi. Tıisti qaýlyǵa Premer-mınıstr Oljas Bektenov qol qoıdy. 

№2 jylý magıstralin rekonstrýktsııalaý jobasy sheńberinde JEO kollektorynan bastap «Sıtı Tsentr» saýda úıi mańaıyna deıin tómenge túsirý boıynsha qurylys-montajdaý jumystary 2024 jyly bastaldy. Jylý magıstraliniń bul ýchaskesi 1987 jyly paıdalanýǵa berilgen. Osy kezeńde kótergish temirbeton konstrýktsııalary, bekitý armatýrasy birshama tozdy. 

Oblys ákimdiginiń málimetinshe, atalǵan ýchaskede rekonstrýktsııalaý jumystary 2025-2026 jyldary jylytý maýsymy bastalǵanǵa deıin aıaqtalady. 

Jobany júzege asyrý jylý jelileriniń tozýyn azaıtýǵa, ystyq sý berýdiń ótkizý qabiletin arttyrýǵa jáne paıdalaný shyǵyndaryn azaıtýǵa múmkindik beredi. 

Jalpy, Oral qalasynyń jylý magıstraldy jelileriniń uzyndyǵy – 249 shaqyrym. Nysan ótken ǵasyrdyń 70-80 jyldary paıdalanýǵa berilgen. Qazirgi ýaqytta tozý deńgeıi 50%-dy quraıdy. Infraqurylymdy jańǵyrtýǵa erekshe kóńil bólinýde. Jóndeý jumystary jalǵasyp jatyr.