Úkimet óńirlerdegi áleýmettik mańyzy bar taýarlardyń baǵasyn talqylady

ASTANA. KAZINFORM – Ótken senbide Premer-mınıstrdiń orynbasary — ulttyq ekonomıka mınıstri Serik Jumanǵarınnyń tóraǵalyǵymen áleýmettik mańyzy bar azyq-túlik taýarlarynyń baǵasy talqylandy. Bul týraly Úkimettiń baspasóz qyzmeti habarlady. 

Aqpan aıynyń basynan beri baǵanyń ortasha ósý ındeksi 0,5%, bul ótken jyldyń osy kezeńimen salystyrǵanda eki ese tómen (1%).

Memleket basshysynyń ınflıatsııany turaqtandyrý jónindegi tapsyrmasyn oryndaý aıasynda apta saıynǵy keńeste baǵanyń eń joǵary ósimi tirkelgen óńirlerdegi jaǵdaıdy maqsatty túrde qaraý týraly sheshim qabyldandy. Jyl basynan beri mundaı óńirler qatarynda Mańǵystaý oblysy (ÁMAT boıynsha ósim — 2%) jáne Túrkistan oblysy (1,4%) atalyp keledi.

Mańǵystaý oblysynda baǵanyń eń joǵary ósimi qyzanaq, sıyr eti, aıran, sary maı, kartop jáne basqa da birqatar ónimder boıynsha tirkeldi.

Óńirde iri sút ónimderin óndiretin, et óńdeıtin, un jáne nan shyǵaratyn kásiporyndar jumys isteıtini sóz boldy. Alaıda óńirde kókónis óndiretin kásiporyndar joq. Baǵa ósiminiń negizgi faktorlary — kúrdeli logıstıka, azyq-túlik ónimderiniń jergilikti jerde jetkiliksiz kólemde óndiriletini jáne ımportqa degen joǵary táýeldilik. Sonymen qatar kókónisti turaqtandyrý qorlary arqyly satý jumystary tıisti qarqynda júrgizilmeı otyr.

Vıtse-premer óńirdiń negizgi óndirýshileri jol berip otyrǵan baǵa ósiminiń sebepterine egjeı-tegjeıli taldaý júrgizip, Saýda komıtetine jáne «Qazaqstan temir joly» ulttyq kompanııasymen birlesip turaqtandyrý sharalaryn ázirleýdi tapsyrdy.

Túrkistan oblysynda baǵanyń ortasha ósý ındeksi Mańǵystaý oblysymen salystyrǵanda tómen. Óńirde taýyq jumyrtqasyn, sút ónimderin, kókónis pen et óndiretin iri kásiporyndar jumys isteıdi.

Keńes barysynda qus eti men jumyrtqa óndirýshilerge jemge arnalǵan arzandatylǵan un qajettigi aıtyldy. Bul ónimniń ózindik qunyn tómendetip, baǵany turaqtandyrýǵa múmkindik beredi.

Vıtse-premer «Azyq-túlik kelisimshart korporatsııasy» ulttyq kompanııasyna óńirdi qajetti kólemde tómendetilgen baǵada astyqpen qamtamasyz etýdi tapsyrdy.

— Apta saıyn biz baǵa ósimi tirkelgen óńirlerdi maqsatty túrde qaraımyz. Saýda komıteti jetkizý arnalary men árbir áleýmettik ónimdi satý kezeńine deıingi búkil tizbekti jedel taldap, qymbattaýdyń qaı kezeńde týyndaıtynyn jáne ortalyq deńgeıde qandaı sharalar qajet ekenin anyqtaýy tıis. Óńirler baǵa ósiminiń sebepterin jedel anyqtap, tıisti sheshimder qabyldaýǵa mindetti, — dedi Serik Jumanǵarın.

Sondaı-aq keńes qorytyndysy boıynsha vıtse-premer barlyq óńirlerge naýryz aıynyń sońyna deıin turaqtandyrý qorlaryndaǵy kókónis qoryn tolyq ótkizýdi, al Saýda jáne ıntegratsııa mınıstrligine naýryz aıynyń ekinshi jartysynan bastap erte pisetin kókónisterdiń jetkizilýin qamtamasyz etýdi tapsyrdy.

Aıta ketelik Aýyl sharýashylyǵy vıtse-mınıstri Azat Sultanov azyq-túlik baǵasynyń kúrt ósýine jol bermeıtinin aıtqan edi.