Arabtyń dástúrli bıin bılegen robottar jelide tanymal boldy

ASTANA. KAZINFORM — Áleýmettik jelilerde arabtyń dástúrli bıin bılegen robottardyń vıdeosy tanymal bola bastady. Adam tárizdi robottar 2025 jyly Ábý-Dabıde ótken RoboCup Asia-Pacific jarysynda kórsetildi, dep habarlaıdy Kazinform menshikti tilshisi habarlady.

Ábý-Dabıde Abu Dhabi Autonomous Week avtonomdy tehnologııalar aptalyǵy ótip jatyr. Sol aıasynda RoboCup Asia-Pacific 2025 robottar saıysy uıymdastyryldy.

Sharanyń taqyryby – «Turaqty bolashaq úshin jasandy ıntellekt jáne robototehnıka». Kýbokqa ártúrli elderden 170-ten astam komanda qatysyp jatyr.

Robot óndirýshi kompanııalar kýbok aıasynda ónimderin ártúrli nomınatsııalar boıynsha tanystyrdy. Kórermenderdi robot-fýtbolshylar, barıster, kómekshiler tańǵaldyrdy.

Booster Robotics kompanııasy RoboCup 2025 alańynda bıiktigi 95 sm, salmaǵy 19,5 kg bolatyn gýmanoıd robotyn tanystyrdy. Jelidegi rolıkte osy kompanııanyń robottary emırattyq dástúrli erlerdiń «Al-Aııala» bıin bılep júrgeni kórsetilgen. Robottar emırattyq bas kıimder kıgen.

Khaleej Times habarlaǵandaı, mundaı robottyń bastapqy baǵasy – 5 999 AQSh dollary. Úsh model qoljetimdi: «Gık», «Bilim berý» jáne «Kásibı».

Abu Dhabi Autonomous Week sharasy 2025 jylǵy 10–15 qarasha aralyǵynda Ábý-Dabıde ótedi. Ol avtonomdy tehnologııalar, «aqyldy» mobıldik júıeler men bolashaq tehnologııalaryna arnalǵan jáne emırattyń ınnovatsııalyq áleýetin kórsetýge baǵyttalǵan. Shara Aqyldy jáne avtonomdy júıeler keńesi uıymdastyrýymen ótkiziledi.

Budan buryn Ilon Mask tanystyrǵan adamtektes robot Optimus qazir Tesla kórmelerinde, zaýyttarynda jáne túrli sharalarda jıi kórsetilip júrgeni habarlandy. Biraq Mask bul jobany shoý úshin emes, adamnyń kúndelikti ómirin jeńildetetin tehnologııa retinde qarastyratynyn aıtty.