Úkimet Nura toptyq sý qubyryn rekonstrýktsııalaýǵa rezervten 3,1 mlrd teńgeden astam qarajat bóldi

ASTANA. KAZINFORM - Memleket basshysy Qasym-Jomart Toqaevtyń tapsyrmasy boıynsha júrgizilip jatqan sý sharýashylyǵy ınfraqurylymyn keshendi jańǵyrtý jumystary aıasynda Úkimet rezervinen Nura toptyq sý qubyryn rekonstrýktsııalaýǵa 3,1 mlrd teńgeden astam qarajat bólindi. Tıisti qaýlyǵa QR Premer-Mınıstri Oljas Bektenov qol qoıdy.

Búgingi tańda uzyndyǵy 337 shaqyrym Nura toptyq sý qubyry – Aqmola oblysynyń Egindikól, Qorǵaljyn jáne Atbasar aýdandarynyń 24 eldi mekenin sýmen jabdyqtaýdyń balamasyz jalǵyz sý kózi. Bul rette 1967 jyly salynǵan magıstraldyq jeliniń paıdalaný ýaqyty tıisti merziminen 2 ese asyp ketken. Sý qubyrynyń tozýy 90%-ǵa jetken. Ásirese, Qorǵaljyn jáne Egindikól aýdandarynyń aýmaǵy arqyly ótetin ýchaskede jaǵdaı kúrdeli. Ol jerdegi negizgi qurylystardy dereý aýystyrý jáne rekonstrýktsııalaý qajet.

Qaýly Premer-Mınıstrdiń 2024 jylǵy 14 mamyrdaǵy tapsyrmasyn oryndaý maqsatynda ázirlendi. Úkimet rezervinen qarajat Nura toptyq sý qubyryn (1-kezek, 1 jáne 2 iske qosý keshenderi) qaıta jańartýǵa baǵyttalady. Bul qurylys-montaj jumystaryn, tehnıkalyq jáne avtorlyq qadaǵalaýdy qamtıdy.

Esterińizge sala keteıik, Memleket basshysynyń sýmen qamtamasyz etý máselesin sheshý jónindegi tapsyrmalaryn oryndaý aıasynda Qazaqstanda 2,5 mlrd tekshe metrge deıin sý jınaı alatyn 20 jańa sý qoımasyn salý jumystary júrgizilýde. Birinshi kezeńde Aqmola, Batys Qazaqstan, Jambyl, Jetisý, Qyzylorda jáne Túrkistan oblystarynda sý qoımalaryn salý kózdelgen.

Sondaı-aq jalpy kólemi 1,9 mlrd tekshe metr bolatyn qoldanystaǵy 15 sý qoımasyn rekonstrýktsııalaý josparda bar.