Úkimet nemis ınvestorlarymen birge Jetisýda halyqaralyq áýejaı salady
ASTANA. KAZINFORM – Premer-mınıstr Oljas Bektenov Skyhansa kompanııasynyń negizin qalaýshy jáne dırektorlar keńesiniń múshesi, doktor Krıstın Grettsbahpen kezdesý ótkizdi. Onda Jetisý oblysyndaǵy «Qorǵas» shekara mańy yntymaqtastyǵy halyqaralyq ortalyǵy mańynda júk jáne jolaýshylar áýejaıyn salý jobasyn júzege asyrý máseleleri talqylandy. Bul týraly Úkimettiń baspasóz qyzmeti málimdedi.
«Qorǵas-Shyǵys qaqpasy» AEA-daǵy halyqaralyq júk jáne jolaýshylar áýejaıynyń jobasy ICAO halyqaralyq usynymdaryna sáıkes avıatsııalyq ınfraqurylym salýdyń úsh kezeńdi baǵdarlamasyn kózdeıdi.
Birinshi kezeń sheńberinde 2027 jylǵa deıin: ótkizý múmkindigi saǵatyna 50 adamǵa deıin jolaýshylar termınalyn (2032 jylǵa qaraı – saǵatyna 500 adamǵa deıin);
JET A-1 avıaotyny jańa túriniń zamanaýı otyn qoımasynyń kólemi jylyna 200 myń tonnaǵa deıin (2032 jylǵa qaraı – 550 myń tonnaǵa deıin);
Avtoturaǵy jáne jylyna 50 myń tonna temirjol tuıyǵy bar júk termınalyn (2032 jylǵa qaraı – jylyna 250 myń tonnaǵa deıin) salý josparlanyp otyr.
Ekinshi jáne úshinshi kezeńder sheńberinde 2032 jylǵa deıin týrıstik jáne oıyn-saýyq ınfraqurylymy da qurylady. Investıtsııalardyń jalpy kólemi shamamen 250 mlrd teńge. Sondaı-aq jobada Air–Rail–Auto-Air júk tasymaldarynyń mýltımodaldy syzbasyn ázirleý jáne Azııa-Tynyq muhıty aımaǵy baǵytyndaǵy kólik jáne logıstıkalyq marshrýttardyń túıisken jerinde ekonomıkalyq ósýdiń jańa múmkindikterin ashý kózdelgen.
– Prezıdent Qasym-Jomart Toqaev Qazaqstan ekonomıkasy qurylymyn ártaraptandyrý jónindegi aýqymdy jumys sheńberinde kólik-logıstıka salasyn basym baǵyttardyń biri retinde atady. Jetisý oblysynda zamanaýı áýejaı salý jobasyn júzege asyrý ınfraqurylymdy damytýǵa eleýli serpin beredi jáne Qazaqstannyń Qytaı, Ortalyq Azııa jáne Eýropa arasyndaǵy tranzıttik hab retindegi rólin nyǵaıtady, - dep atap ótti Premer-mınıstr Oljas Bektenov.
Óz kezeginde Skyhansa kompanııasynyń negizin qalaýshy, dırektorlar keńesiniń múshesi, doktor Krıstın Grettsbah jobanyń avıatsııalyq ınfraqurylymdy damytýǵa ǵana emes, sonymen qatar óńirde zamanaýı logıstıkalyq jáne iskerlik ortalyq qalyptastyrýǵa baǵyttalǵanyn atap ótti.
– Biz jaı ǵana áýejaı emes, halyqaralyq deńgeıdegi damyǵan ınfraqurylymy: júk jáne jolaýshylar termınaldary, janarmaı quıý kesheni, áýe kemelerine avıatsııalyq-tehnıkalyq qyzmet kórsetý ortalyǵy (MRO), bıznes ortalyǵy, mýltımodaldy logıstıkalyq múmkindikterge arnalǵan qonaq úıleri bar kópfýnktsıonaldy óńirlik hab quryp jatyrmyz. Onyń Qytaımen shekaraǵa jaqyn ornalasýy «Qorǵas – Shyǵys qaqpasy» AEA sheńberinde halyqaralyq saýdany damytýǵa qolaıly jaǵdaı jasaıdy. Al onyń temirjol jáne avtojol jelilerine qosylýy jańa Jibek jolyndaǵy keleshegi zor logıstıkalyq toraptardyń birine aınaldyrady, - dep atap ótti doktor Krıstın Grettsbah.
Kezdesý sońynda QR Kólik mınıstrligi men Skyhansa arasynda Investıtsııalar týraly kelisimge qol qoıyldy. Qujatqa sáıkes, ınvestor qajetti avıatsııalyq ınfraqurylym qurylysyn, negizinen otandyq materıaldar men qyzmetterdi paıdalanýdy, sondaı-aq jobany júzege asyrýǵa qyzmetkerlerdiń keminde 90%-y Qazaqstan azamattary bolýyn qamtamasyz etýge mindetteledi.
Qazaqstandyq tarap ınjenerlik jáne kólik ınfraqurylymyn tartyp, sondaı-aq arnaıy ekonomıkalyq aımaqqa qatysýshylarǵa maqsatty jeńildikter beredi.
Aıta keteıik, joba Skyhansa birlesken qazaqstandyq-germandyq kásipornynyń qatysýymen júzege asyrylyp jatyr. Germanııa tarapynan seriktes retinde avıatsııalyq termınaldar men ınfraqurylymdy damytý boıynsha joǵary qyzmet kórsetetin The Hansa Consortium kompanııasy, Qazaqstan tarapynan – Qazaqstan, Ortalyq Azııa jáne Kavkaz naryǵyndaǵy áýejaılar úshin keshendi qyzmetter men ınjınırıngtik sheshimder usynatyn Skymax Technologies kompanııalar toby áreket etedi.
Aıta keteıik, Jetisý oblysynda segiz jańa sý qoımasy salynady.