Úkimet nelikten ıpotekalyq baǵdarlamalardy kóbeıtti – depýtat jaýaby
ASTANA. KAZINFORM — Osy aptada Úkimet halyq úshin ıpotekalyq nesıeni eki ese arttyryp, baspanany qoljetimdi etetin sheshim qabyldaǵan edi. Májilis depýtaty Erkin Amanjoluly bul bastamanyń nege kóterilgenin jáne qalaı iske asyrylatynyn aıtyp berdi.
— Keshegi Úkimettiń sheshimi shynyn aıtý kerek, jyl aıaǵyna deıin tótenshe jaǵdaıda qabyldanǵan ýaqytsha sheshimder. Jaqynda ǵana Ulttyq bank bazalyq mólsherldemeni 18 paıyzǵa deıin kóterdi. Bul jóninde túrli pikir bolýy múmkin, biraq olardyń negizgi maqsaty — ınflıatsııany toqtatý. Bárimiz túsinemiz, mólsherlemeni kóterý búkil banktegi nesıeniń qymbattaıtynyn bildiredi. Kóptegen banktiń ıpotekalyq nesıeni toqtatyp tastaǵanyn kórip otyrmyz. Sebebi 18 paıyzdyq bazalyq mólsherlemege bank óz tabysyn qosady, sosyn mindetti túrde ınflıatsııa qosa esepteledi. Odan shyǵatyn aýqymdy paıyzdyq mólsherlemege eshkim ıpoteka rásimdemeıdi. Sondyqtan qazir ıpotekalyq naryq tolyǵymen toqtap qaldy, — dedi depýtat KAZINFORM agenttiginiń «Bizdin orta» podkastynda.
Al baspana — azyq-túlikten keıingi ekinshi mańyzdy qajettilik. Sondyqtan depýtat osy máseleni tyǵyz sheshý keregin, ıpotekany saqtap qalý keregin jetkizdi.
— Bizde Jańa jyldan bastap bank qyzmeti jóninde jańa zań qabyldanady, sonda jaǵdaı ózgeredi. Biraq jańa jylǵa deıin biraz ýaqyt bar. Sondyqtan ıpotekalyq naryqty saqtap qalý úshin Úkimet osyndaı shara qabyldady. Meniń oıymsha, tyǵyryqtan shyǵýdyń joly — jyl aıaǵyna deıin ıgerilme ı qalǵan qarajatty jedel túrde ıpotekalyq nesıelerdi sýbsıdııalaýǵa jiberý kerek. Úkimette naqty qandaı mehanızm bolatynyn aıta almaımyn, bul keshe ǵana qabyldanǵan sheshim. Menińshe bos qarajatty izdep taýyp, sýbsıdııalaýǵa jiberý kerek, — dedi Erkin Amanjoluly.
Eske sala ketsek, Prezıdent Premer-mınıstr Oljas Bektenovke apta sońyna deıin shaǵyn jáne orta bıznesti qoldaýǵa, ınvestıtsııalyq ahýaldy jaqsartýǵa, eldegi ekonomıkalyq jaǵdaıdy turaqtandyrýǵa baǵyttalǵan túzetýler engizip, qajetti sheshimder ázirleýdi tapsyrdy.
Nátıjesinde benzın men tarıf baǵasyna moratorıı engizilip, ıpoteka kólemi ulǵaıatyn boldy.
Buǵan deıin podkast qonaqtary eldegi bıýdjet tapshylyǵyn joıý úshin Ulttyq qordan qarjy alýdy toqtatyp, bankterge jaýapkershilik júkteý keregin aıtqan edi.