Úkimet músheleri men ulttyq kompanııa basshylary qandaı jaǵdaıda Quryltaıǵa shaqyrylady
ASTANA. KAZINFORM — Búgin elordada ótken baspasóz máslıhatynda Quryltaı depýtaty Únzıla Shapaq jekelegen mınıstrler men kvazımemlekettik sektor basshylarynyń depýtattar aldynda esep berý tártibin túsindirdi.
Quryltaıdyń jalpy otyrysynan keıin jýrnalıster depýtattan: «Jekelegen mınıstrler men «Samuryq-Qazyna» sekildi kvazımemlekettik kompanııalardyń basshylary Quryltaı depýtattarynyń aldynda esep bere me? Eger esep beretin bolsa, qanshalyqty jıi?» dep surady.
Únzıla Shapaqtyń aıtýynsha, Úkimet jumysyna qatysty máseleler qaralǵan kezde, jekelegen mınıstrler, memlekettik organdardyń basshylary, sondaı-aq kvazımemlekettik sektor kompanııalarynyń jetekshileri Quryltaıǵa shaqyrylýy múmkin.
Sonymen qatar Joǵary aýdıtorlyq palata jylyna eki ret baıandama jasaıdy. Onyń biri jyldyq bıýdjettiń atqarylýyna arnalsa, ekinshisi jekelegen taqyryptar boıynsha júrgizilgen aýdıt qorytyndylaryna qatysty bolady. Mundaı baıandamalarda kvazımemlekettik sektordyń nátıjeligi, ulttyq kompanııalardyń qyzmeti men memlekettiń qatysýymen júzege asyrylatyn is-sharalardyń tıimdiligi qaralýy múmkin.
- Osyndaı jaǵdaıda kvazımemlekettik sektor men tıisti kompanııalardyń basshylary keledi. Mysaly, «Samuryq-Qazyna» qorynyń basshylyǵy da shaqyrylýy múmkin, – dedi depýtat.
Munymen qosa, konstıtýtsııalyq zańdar deńgeıinde Úkimettiń jekelegen múshesiniń qyzmeti týraly esepti tyńdaý múmkindigi qarastyrylǵan. Onyń qorytyndysy boıynsha konstıtýtsııalyq jaýapkershilik máselesi de kóterilýi yqtımal.
Depýtattyń sózinshe, osy rásimder aıasynda ulttyq kompanııalardyń basshylary Quryltaıǵa kelip, depýtattardyń suraqtaryna jaýap bere alady.
Budan buryn habarlanǵandaı, D. Espaeva depýtattardyń saýaly boıynsha Quryltaı basshylyǵy eshqandaı shekteý qoımaıtynyn aıtty.
