Úkimet: muǵalimder júktemesi azaıady, eń tómengi jalaqy 110 myń teńge bolady
ASTANA. KAZINFORM — Ataýly áleýmettik qoldaý kórsetý bóliginde jyl sońyna deıin jańa tsıfrlyq tásilderdi synaqtan ótkizý aıaqtalady. Bul týraly Úkimet otyrysynda Prezıdent Joldaýyn iske asyrýdy talqylaý barysynda Premer-mınıstrdiń orynbasary — Ulttyq ekonomıka mınıstri Serik Jumanǵarın málim etti.
— Áleýmettik saıasat jáne adamı kapıtaldy damytý salasynda azamattardyń ál-aýqatyn jaqsartýǵa baǵyttalǵan negizgi bastamalardy atap óteıin. Halyqtyń tabysyn arttyrý úshin eń tómengi aılyq jalaqy mólsheri 85 myńnan 110 myń teńgege deıin ósedi. Medıtsınalyq-sanıtarlyq alǵashqy kómektiń ýchaskelik qyzmeti mamandarynyń jalaqysy tájirıbesi men júktemesine qaraı saralanǵan qosymsha tólemder esebinen arttyrylatyn bolady, — dedi Serik Jumanǵarın.
Onyń sózine qaraǵanda, ataýly áleýmettik qoldaý kórsetý bóliginde jyl sońyna deıin otbasylardyń ál-aýqatyn baǵalaýdyń jańa tsıfrlyq tásilderin pılottyq synaqtan ótkizý aıaqtalady, muqtajdyq qaǵıdatyn engizý boıynsha aqparattyq-túsindirý jumystary bastalady.
— Bilim berý salasynda kelesi jyldyń sońyna deıin balalardyń erekshe bilim berý qajettilikterin erte baǵalaý boıynsha másele pysyqtalatyn bolady. Sonymen qatar, muǵalimder qaýymyn ınstıtýtsıonaldyq qoldaýǵa erekshe kóńil bólinedi. Pedagogtarge túsetin artyq júktemeni esepter sanyn azaıtý, onyń ishinde tsıfrlyq platformalar men júıelerdegi esepterdi qysqartý esebinen aıtarlyqtaı tómendetý josparlanyp otyr, — dedi mınıstr.
Buǵan deıin habarlanǵandaı, búgin Úkimet otyrysynda Memleket basshysynyń bıylǵy 28 qazandaǵy «Jańa tarıhı kezeńdegi Qazaqstannyń ózekti mindetteri» atty Qazaqstan halqyna Joldaýyn iske asyrý jónindegi jalpyulttyq is-sharalar josparynyń» jobasy maquldanyp, tıisti qaýly qabyldandy.
