Úkimet memlekettik uıymdardyń qurylymyn ózgertedi: qaı mekemeler biriktirilip, qaısysy taratylady
ASTANA. KAZINFORM — Qazaqstan Úkimeti memlekettik basqarýdyń jekelegen máseleleri týraly qaýly qabyldady. Qujatqa sáıkes, birqatar memlekettik uıym qaıta uıymdastyrylyp, keıbir kásiporyndardyń qyzmeti toqtatylady.
Qaýlyǵa sáıkes, «Ǵarysh tehnıkasy jáne tehnologııalary ınstıtýty» JShS 2028 jylǵy 1 naýryzdan bastap aktsıonerlik qoǵam bolyp qaıta qurylady. Keıin jańadan qurylǵan aktsıonerlik qoǵam «Qazaqstan Ǵarysh Sapary» ulttyq kompanııasy» AQ quramyna qosylady.
Mádenıet salasynda 2027 jylǵy 1 qańtardan bastap «Kamerata Qazaqstan» klassıkalyq mýzyka ansambli Jambyl atyndaǵy Qazaq memlekettik akademııalyq fılarmonııanyń quramyna qosylady. Al biregeı ysqyly mýzykalyq aspaptardyń memlekettik kollektsııasy Qazaqstan Respýblıkasynyń Ortalyq memlekettik mýzeıine beriledi.
2027 jylǵy 1 shildeden bastap Ulttyq kınony qoldaý memlekettik ortalyǵy Sháken Aımanov atyndaǵy «Qazaqfılm» AQ quramyna engiziledi.
Zaǵıp jáne nashar kóretin azamattarǵa arnalǵan respýblıkalyq kitaphana Qazaqstan Respýblıkasynyń Ulttyq kitaphanasynyń qurylymdyq bólimshesine aınalady.
Bilim berý salasynda Balalardy erte damytý ınstıtýty, Arnaıy jáne ınklıýzıvti bilim berýdi damytýdyń ulttyq ǵylymı-praktıkalyq ortalyǵy jáne Respýblıkalyq qosymsha bilim berý oqý-ádistemelik ortalyǵy Ybyraı Altynsarın atyndaǵy Ulttyq bilim akademııasynyń quramyna biriktiriledi.
Densaýlyq saqtaý salasynda Respýblıkalyq qan ortalyǵy Ǵylymı-óndiristik transfýzıologııa ortalyǵymen biriktiriledi. Al «Alataý» balalar klınıkalyq shıpajaıy Kýrortologııa jáne medıtsınalyq ońaltý ǵylymı-zertteý ınstıtýtynyń quramyna qosylady.
Sonymen qatar qaýlyǵa sáıkes úsh uıymnyń qyzmeti toqtatylady. Atap aıtqanda, 2027 jylǵy 1 shildeden bastap «Talap» kommertsııalyq emes aktsıonerlik qoǵamy, al 2027 jylǵy 1 qańtardan bastap «Qoldanbaly etnosaıası zertteýler ınstıtýty» JShS men «Dostyq Energo» aktsıonerlik qoǵamy taratylady.
Úkimet qaýlysy 2026 jylǵy 1 qyrkúıekten bastap kúshine enedi. Alaıda onyń jekelegen erejeleri ózge merzimderde kúshine enedi.
Buǵan deıin Premer-Mınıstr Oljas Bektenov jańa Konstıtýtsııanyń kúshine enýine baılanysty barlyq memlekettik jáne qoǵamdyq ınstıtýttardy túbegeıli jańǵyrtý bastalǵanyn málimdegen edi.
