Úkimet Memlekettik múlik týraly zańdy jańartady
ASTANA. KAZINFORM — Memlekettik uıymdar men kompanııalar negizsiz kóbeıip, jeke kásiporyndardyń tolyqqandy damýyna múmkindik bermeı otyr. Bul týraly Prezıdent Qasym-Jomart Toqaev Qazaqstan halqyna Joldaýy barysynda aıtty.
— Taǵy bir óte mańyzdy másele. Memlekettiń ekonomıkadaǵy úlesin azaıtý kóp jyldan beri ózekti mindet bolyp keledi. Memlekettik uıymdar men kompanııalar negizsiz kóbeıip, jeke kásiporyndardyń tolyqqandy damýyna múmkindik bermeı otyr. Elimizde memlekettiń úlesi bar uıymdar sany 25 myńǵa jýyqtaıdy. Kópshiliginiń qyzmeti men qurylymy syn kótermeıdi, qısynǵa da kelmeıdi. Qazir kommertsııalyq emes mindetterdi oryndaý úshin kommertsııalyq ádis-tásilder keńinen qoldanylyp júr. Sonyń saldarynan túrli shyǵyndar artyp, korporatıvti organdar kóbeıip ketti. Naqty nátıjege nazar aýdarylmaıdy. Strategııalyq josparlaý jáne reformalar agenttigine Úkimetpen birlesip, memlekettik sektordy reformalaý týraly naqty usynystar ázirleýdi tapsyramyn, qajet bolsa, arnaıy Jarlyq shyǵaramyn, — dedi Qasym-Jomart Toqaev.
Prezıdenttiń aıtýynsha, Úkimet Memlekettik múlik týraly zańdy jańartýǵa tıis. Zańda memlekettiń ekonomıkaǵa qatysý shegi naqty aıqyndalýy kerek. Sondaı-aq basqarý isine qatysty quqyqtyq talaptar kórsetilýi qajet.
Aıta keteıik, Joldaýdyń onlaın translıatsııasy Jibek Joly efırinde, sondaı-aq telearnanyń YouTube arnasynda júrip jatyr.
Kazinform saıty tikeleı efırmen qatar, jazbasha translıatsııa da jasaıdy.
Sondaı-aq Joldaý mátinin agenttiktiń telegram arnasynan oqýǵa bolady.