Megajobalar men únem: Premer-mınıstr olardyń qalaı tańdalatynyn túsindirdi

ASTANA. KAZINFORM — Premer-mınıstr Oljas Bektenov Úkimette ótken baspasóz máslıhatynda megajobalar men iri nysandar qurylysy týraly óz pikirin bildirdi.

— Prezıdent birneshe ret únemdeýge shaqyrǵan bolatyn. Alaıda biz megajobalardyń júzege asyp jatqanyn kórip otyrmyz. Mysaly, Qabyldaý úıi, Kongress-ortalyq, Respýblıka saraıynyń qurylysy júrip jatyr. Astanada mundaı nysandar burynnan bar. Qazirgi ýaqytta osyndaı nysandar qanshalyqty qajet? Óıtkeni bir nysannyń qurylysyna keminde 10 mıllıard teńge qajet. Bul somaǵa 60 monoqala men 16 shaǵyn qalada 40 jobany qarjylandyrýǵa bolady. Bul shyǵyndar únemdeý saıasatyna qanshalyqty sáıkes keledi? Mundaı sheshimderdi kim qabyldaıdy jáne jobalardyń basymdyqtary qalaı aıqyndalady, — dep suraq qoıdy jýrnalıst.

Óz jaýabynda O. Bektenov ákimshilik jáne basqa da ǵımarattardy salmaý múmkin emestigin aıtty.

— Memleket mundaı nysandardy salýǵa tıis jáne sala beredi de. Munda basymdyq óndiris, ıaǵnı ınfraqurylym sekildi ekonomıkalyq qaıtymy bar jobalarǵa beriledi. Memleket shyǵyndarynyń basym bóligi dál osy baǵyttaǵy jobalarǵa jumsalyp otyr. Úkimet qandaı da bir nysandy qarjylandyrý týraly sheshimdi tıisti vedomstvolardyń baǵasyna jáne sol nysannyń el úshin mańyzdylyǵyna súıene otyryp qabyldaıdy. Árıne, keı jerde qatelesýimiz de múmkin, biraq jalpy alǵanda biz árbir jobany jáne olardyń qunyn muqııat saraptamadan ótkizemiz. Nysan quny shekten tys artyp ketpeýin de qadaǵalaımyz, — dedi Úkimet basshysy.

Budan buryn Premer-mınıstr Oljas Bektenov Úkimet otyrysynan keıin ótip jatqan baspasóz máslıhatynda Óskemen, Semeı, Kókshetaý qalalarynda salynýǵa tıis úsh jylý-elektr ortalyǵynyń taǵdyry ne bolatynyn aıtty.