Úkimet medıtsınalyq qyzmetterdiń sapasyna jáne kólemine monıtorıng júrgizetin jańa júıe qalyptastyrýǵa tıis — Prezıdent
ASTANA. KAZINFORM — Túrli aımaqta boı kótergen kópbeıindi aýrýhanalardy bıýrokratııalyq shyrǵalańǵa salmaı, paıdalanýǵa berý qajet. Bul týraly Memleket basshysy Qasym-Jomart Toqaev Qazaqstan halqyna Joldaýynda aıtty.
— Elimizde medıtsına nysandary birtindep jańǵyrtylyp jatyr. Aýyldaǵy feldsherlik-akýsherlik pýnktterden bastap mamandandyrylǵan aýrýhanalarǵa deıin jańartylyp jatyr. «Aýylda densaýlyq saqtaýdy jańǵyrtý» ulttyq jobasy aıasynda 540 nysan salyndy, osy jyldyń sońyna deıin taǵy 115 nysan paıdalanýǵa berilmek. Al qalaly jerlerde densaýlyq saqtaý salasyna qatysty birqatar iri nysan iske qosyldy. Mysaly, Astanada onkologııa ortalyǵy, Almatyda Juqpaly aýrýlardyń ǵylymı ortalyǵy ashyldy, — dedi Memleket basshysy.
Osy rette Prezıdent buǵan deıin túrli aımaqta boı kótergen kópbeıindi aýrýhanalardy bıýrokratııalyq shyrǵalańǵa salmaı, paıdalanýǵa berý qajettigin basa aıtty.
Sondaı-aq mundaı jańa nysandar salýdy jalǵastyra bergen jón. Bul jumysqa memlekettik-jekemenshik seriktestik mehanızmderi aıasynda jeke ınvestıtsııany da tartý kerek. Sonda azamattar Astanaǵa kóshe bermeıdi. Basqa da baǵyttar boıynsha jumystardy jandandyrý kerek. Sonyń ishinde farmatsevtıka ónerkásibin damytýǵa basa mán bergen jón. Ózimizde jasalatyn dári-dármektiń túri men sanyn kóbeıtý — strategııalyq mindet. Buǵan, ásirese, pandemııa kezinde ábden kózimiz jetti, — dedi Qasym-Jomart Toqaev.
Memleket basshysy densaýlyq saqtaý júıesiniń qarjylyq turaqtylyǵyna jáne medıtsınalyq qyzmetterge monıtorıng júrgizý isiniń tıimdiligine qatysty máseleler bar ekenin atap ótti.
— Bıýdjet qarjysy shekteýli kezde Áleýmettik medıtsınalyq saqtandyrý qory is júzinde bıýdjetti retteýshi rólin atqaryp otyr. Qor daıyn ónim jetkizetin kásiporyndarǵa baqylaýdy kúsheıtkenniń arqasynda shyǵyndy kóbeıtpeı ustap tur. Úkimet jasandy ıntellekt tehnologııasyn qoldanyp, medıtsınalyq qyzmetterdiń sapasyna jáne kólemine monıtorıng júrgizetin jańa júıe qalyptastyrýǵa tıis. Elimizde dárigerdiń mártebesin kóterip, áleýmettik jaǵdaıyn jaqsartý úshin naqty sharalar qabyldanyp jatyr. Bul jumys óz jalǵasyn tabady, — dedi Prezıdent.
Aıta ketelik 540 jańa medıtsınalyq nysan paıdalanýǵa berilgen edi.