Úkimet medıtsına qyzmetkerlerin qorǵaýdy kúsheıtý jónindegi sharalar keshenin daıyndaıdy
ASTANA. KAZINFORM – Premer-mınıstr Oljas Bektenov Prezıdent Qasym-Jomart Toqaevtyń medıtsına qyzmetkerlerin qorǵaýdy kúsheıtý jáne densaýlyq saqtaý mekemelerindegi qaýipsizdikti arttyrý jónindegi tapsyrmalarynyń oryndalý barysy týraly jıyn ótkizdi. Bul týraly Úkimettiń baspasóz qyzmeti habarlady.
Oǵan Premer-mınıstrdiń orynbasary Ermek Kósherbaev, densaýlyq saqtaý mınıstri Aqmaral Álnazarova, ishki ister mınıstri Erjan Sádenov jáne ádilet vıtse-mınıstri Laýra Mersalımova qatysty.
Densaýlyq saqtaý mınıstrliginiń málimetinshe, 2019 jyldan beri Qazaqstanda dárigerlerge, feldsherlerge, medbıkelerge jáne basqa da densaýlyq saqtaý qyzmetkerlerine jasalǵan shabýyldardyń 170-ten astam faktisi tirkelgen.
Al densaýlyq saqtaý mınıstri habarlaǵandaı, dárigerlerge jasalǵan shabýyldardy quqyq qorǵaý organdary qyzmetkerleriniń jeke basyna qaýip tóndirý áreketimen teńestirý, sondaı-aq medıkterge smart-beınejetondar berý, aýrýhanalarda keshendi kúzet júıelerin engizý jáne qabyldaý bólimshelerinde táýlik boıǵy polıtsııa beketterin ornalastyrýdy kózdeıtin birqatar zańnamalyq túzetýlerdi daıyndaý bastalǵan.
Oljas Bektenov medıtsına qyzmetkerleriniń qaýipsizdigin qamtamasyz etýdiń mańyzdylyǵyna nazar aýdardy.
— Memleket basshysynyń tapsyrmasynyń oryndalýyn qamtamasyz etý qajet. Dárigerlerge shabýyl jasalǵan mundaı oqıǵalar quqyqtyq ádistermen qatań túrde toqtatylýy kerek. Osyǵan baılanysty densaýlyq saqtaý, ishki ister, ádilet mınıstrlikterine on kún merzim ishinde qyzmettik mindetterin atqarý kezinde medıtsına qyzmetkerlerine qatysty zorlyq-zombylyq jasalǵany úshin qylmystyq jaza qarastyrý boıynsha zańnamalyq túzetýler ázirlep, engizýdi tapsyramyn, — dedi Premer-mınıstr.
Іshki ister mınıstriniń málimetinshe, aýrýhanalar men perınataldyq ortalyqtardyń qabyldaý bólmelerinde táýlik boıǵy polıtsııa beketteri qoıylǵan. Barlyǵy 115 densaýlyq saqtaý nysany qorǵaýǵa alyndy. Kıkiljińderge jedel den qoıý maqsatynda marshrýttyq patrýlder kórsetilgen mekemelerge jaqyn ornalastyryldy. Qazirgi ýaqytta medıtsınalyq mekemelerde qaýipsizdikti qamtamasyz etý boıynsha jekelegen sharalar qabyldandy.
Budan bólek, halyq arasynda profılaktıkalyq jáne túsindirý jumystaryn kúsheıtý tapsyryldy.
Memleket basshysy medıtsına qyzmetkerlerine kúsh kórsetetinderge qarsy zańdy kúsheıtýdi tapsyrǵanyn jazǵan bolatynbyz.